Tim di kalamidat ta konsehá suidadanonan prepará pa temporada di orkan
KNMI a duna su promé boletinnan di siklon tropikal:
Tim di kalamidat ta konsehá suidadanonan prepará pa temporada di orkan
Kralendijk – Djamars anochi i djarason den dia, 20 di yüni manisé 21 di yüni, por spera efekto di un siklon tropikal den e área di Boneiru segun KNMI, e servisio meteorológiko di Hulanda. Un siklon tropikal ta un sistema ku formá dor di nubianan di bos i welek organisá, ta drai rònt di su as, i tin un sirkulashon será na nivel abou i ta forma riba oséano tropikal òf sup tropikal.
Djadumingu anochi, 18 di yüni, KNMI a manda e promé boletin informando ku Boneiru lo por sinti e konsekuensha di e tormenta tropikal aki. Mesora e tim di kalamidat, enkabesá pa gezaghebber sr. Edison Rijna, a reuní pa deliberá i evaluá e akshonnan ku por tuma for di awor pa prepará pa e siklon tropikal.
E bientunan fuerte aki lo por kousa olanan di laman relativamente haltu entre 6’or di mainta pa 6’or di atardi, e olanan lo ta entre ocho pa diesdos pia haltu. Ta spera ku e olanan lo subi mas durante oranan di mèrdia. Pa e motibu aki tim di kalamidat ta konsehá piskadónan i usadónan di e bahia pa no subi laman si no ta nesesario.
Manera a komuniká den un komunikado resien Oséano Atlántiko i Caribe su temporada di orkan ta kuminsá 1 di yüni i ta terminá 30 di novèmber.
Gezaghebber Rijna ta súplika tur suidadano pa prepará debidamente pa e temporada di orkan ku a kaba di kuminsá. Pa e siklon tropikal ta spera hopi áwaseru i hopi bientu.
Ta pidi tur suidadano pa prepará i kuminsá kontrolá bentananan ku no ta sera bon. Kontrolá kurá i rondó di kas si tin artefaktonan ku ta lòs i warda esakinan. Prepará bo pakete pa orkan. Pa mas informashon por sigui e informashonnan riba e wèpsait di KNMI. Den kaso di urgensha por tuma kontakto tambe ku e numbernan di urgensha di polis, brantwer i hospital.