Resultadonan preliminar di diálogo demokrátiko tokante komersio elektróniko “E-commerce”
Resultadonan preliminar di diálogo demokrátiko tokante komersio elektróniko “E-commerce”
Willemstad – Ministerio di Desaroyo Ekonómiko (MEO) ta gradisí tur intresado ku a inskribí i partisipá
na e dos diálogonan demokrátiko tokante “E-commerce”. E promé diálogo a tuma lugá dia 13 di yüni i
e di dos dia 20 di yüni. E meta tabata pa kompilá puntonan importante ku lo por aportá na kristalisá
MEO su plan di akshon pa ku “E-commerce”. Komo e promé i di dos akshon prinsipal a keda skohé
respektivamente dor di un total di 93 e partisipantenan pa krea mas opshon i simplifiká pago
elektroniko i pa traha, revisá i aktualisá leinan rondo di “E-commerce”.
A konsultá tambe kiko partisipantenan mes por hasi pa aportá na realisashon di e vishon pa ku “Ecommerce”.
For di e diálogo a sali na kla ku e partisipantenan lo ke djòin huntu i aserka gobiernu komo e
akshonan mas importante ku konhuntamente e aktornan den e sektor por traha riba dje. Na di dos lugá
e partisipantenan a indiká ku nan mes lo ke i por influensia bankonan komersial pa introdusi otro
sistemanan di pago.
Tabata masha interesante pa mira e sinergia durante e proseso di diálogo entre e partisipantenan. E
puntonan prinsipal ku MEO i e sektor mes por traha riba dje, a sali for di un lista muchu mas amplio di
akshonnan ku a yega na dje netamente danki na e sinergia úniko aki.
Ku e resultadonan MEO ta kla pa terminá e rapòrt final ku ta representá un proposishon pa un plan di
akshon konkretu pa ku “E-commerce”. Lo presentá esaki na Minister di Ekonomia, señor Steven Martina.
Sra. Zulaika Mook, direktor di e sektor di Desaroyo Ekonómiko i Inovashon, kier gradisí e tim lokal di
United Nations Development Program (UNDP) pa a kordiná i fasilitá e seshonnan di diálogo aki.