Departamentu di Reibeweis ta pone 2 fecha disponibel pa kambia reibeweis a base di sita

Departamentu di Reibeweis ta pone 2 fecha disponibel pa kambia reibeweis a base di sita

Willemstad – Departamentu di Asuntu Públiko di Gobièrnu di Kòrsou ta partisipá ku lo tin dos fecha disponibel pa renobá reibeweis ku a kaduká. Ta trata di djasabra 1 di yüli i djasabra 8 di yüli 2017 entre 9’or di mainta pa 2:30 dia atardi.

Pa por hasi uso di e oportunidat aki bo mester kumpli ku algun eksigensha. Na promé lugá mester ta trata di un reibeweis ku a kaduká kaba. Tene kuenta ku riba e fechanan menshoná lo kambia solamente reibeweis ku a kaduká promé ku 2 di yüli 2017. Banda di esei mester ta trata di un reibeweis ku no a kaduká mas ku un aña.

Personanan ku ta kumpli ku e eksigenshanan aki i ku ke hasi uso di e oportunidat aki, mester traha un sita via Bentana di Informashon. Pa traha e sita por pasa personal pèrsonalmente na Lokèt di Pèrmit na Saliña # 127 òf yama na telefòn 0800 1515 òf 433-3123.

Un rekordatorio relashoná ku kondishonnan ku mester kumpli ku ne ora bo reibeweis kaduká:
 Den kaso ku bo ta renobá un reibeweis ku ya kaba a kaduká, bo mester identifiká bo mes ku sea pasport òf – sédula válido;
 Bo mester presentá un deklarashon di dòkter no mas bieu ku 2 luna;
 Den kuadro di seguridat general no ta aseptá sèn kèsh. Tin posibilidat pa swipe lokèt òf bo por depositá e sèn promé na Girobank riba number di kuenta 1100033 i bin ku e prueba ku a depositá e sèn;
 Reibeweis ku tin 1 aña kaduká òf mas largu no por wòrdu kambiá riba djasabra

Pa mas informashon por tuma kontakto ku Bentana di Informashon.