PLATAFORMA SKLABITUT I HERENSIA DI SKLABITUT

PLATAFORMA SKLABITUT I HERENSIA DI SKLABITUT
_______________________________________________________________
Djasbra awor, 1 di yüli, ta Dia di Emansipashon.
Ta e fecha ku nos ta konmemorá ku dia 1 di yüli 1863, sklabitut a keda abolí na Kòrsou i tur parti di Reino Hulandes.
Riba e fecha aki, Plataforma Sklabitut i Herensia di Sklabitut, den koperashon ku gobièrnu di Kòrsou, ta duna realse na konmemorashon di 154 aña abolishon di sklabitut kombiná ku bahamentu di bandera riba prome di yüli.
Pa hopi aña kaba paisnan ku tambe a konosé sklabitut, ku sosten di UNESCO, ta konmemorá e fecha di abolishon, konsiderando esaki komo un momentu históriko kaminda a kibra ku un sistema inhumano di opreshon i eksplotashon di hende dor di hende.
Mester konsiderá abolishon di sklabitut komo un paso importante den e proseso di emansipashon di pueblonan ku a biba siglonan largu bou di e sistema di sklabitut i komersio di katibu.
Pa e motibu aki nos tambe na Kòrsou ta pone atenshon na abolishon di sklabitut ku a tuma lugá riba 1 yüli 1863.
Nos mester konmemorá e fecha históriko aki pa motibu ku libertat i igualdat ta e balornan mas sagrado pa humanidat.
Konmemorashon di abolishon di sklabitut pues mester kontribuí pa nos:
• fortifiká nos konsenshi nashonal pa traha na nos propio bienestar
• bira mas konsiente di nos derechinan humano
• fortifiká nos kultura engrandesiendo nos konfiansa i balor propio i lanta un sentido di union bou di nos pueblo.
Plataforma Sklabitut i Herensia di Sklabitut huntu ku gobiérnu di Kòrsou, na 2013 a bai di akuerdo pa mara e fechanan di 1di yüli, Dia di Emansipashon i 2 di yüli, dia di Bandera, na otro.
2
Esaki, komokiera ku ta fechanan ku mester ser konsiderá komo momentunan importante den kuadro di nos proseso di emansipashon komo pueblo.
Ta fechanan kaminda nos mester reflekshoná riba nos mes komo Yu di Kòrsou, riba e kosnan ku nos mester hasi pa sigui riba e kaminda largu di emansipashon.
Den e kuadro aki riba djasabra 1 di yuli próksimo lo tin un programa di konmemorashon na Plasa Brion ku ta konsistí di palabranan di reflekshon tokante abolishon i emansipashon kombiná ku un pènel di hoben ku lo debatí riba e nifikashon di abolishon i emansipashon kombiná ku presentashonnan kultural. (mira programa anekso)
E programa ta kuminsá 6 or di atardi, despues di bahamentu di bandera, i ta dura te mitar di 9 di anochi.
Nos di Plataforma Sklabitut i Herensia di Sklabitut, konmemorando 1 yüli 1863 den kombinashon ku Dia di Bandera, ta spera di por sigui duna un aporte fuerte konmemorando mas fecha di importansia históriko pa di tal forma fomentá mas konsenshi históriko bou di nos pueblo.
Un pueblo ku no konosé ni ta aseptá su propio historia difísilmente por avansá pa logra mas i mas emansipashon.
Pa mas informashon:
Drs. Frank Quirindongo, Presidente di PSHS, Tel. 5226982
Drs. Jeanne Henriquez, miembro di Plataforma, Tel. 6669973

PROGRAMA SELEBRASHON DIA DI EMANSIPASHON 1 YÜLI 2017
18.30: Moderadó, Sr. Max Elstak, ta hasi apertura di e programa ofisial
18.35: Presidente di Plataforma Sklabitut i Herensia di Sklabit, Sr. drs. Frank Quirindongo
ta dediká algun palabra di reflekshon tokante nifikashon di abolishon i emansipashon
18.40: Minister di Enseñansa, Siensia, Kultura i Deporte, sra. drs. M. Alcalá-Walle, ta reflehá
tokante Dia di Emansipashon
18.45: Buskando nos identidat: deklamashon di Grupo Anaku Kuumba
19.00: Diskushon interaktivo ku 6 hoben krítiko tokante e pregunta:
• Kiko abolishon di sklabitut ta nifiká pa nos?
19.15: Video: Kiko ta rasismo i kon por traha pa logra mas emansipashon?
19.30: Kontinuashon diskushon interaktivol tokante e preguntanan:
• Kon leu nos ta den nos proseso pa emansipashon?
• Kiko nos por hasi pa hasi pa avansá mas den nos proseso di emansipashon?
20.00: Reflekshon di 2 adulto mayó tokante diskushon ku hobennan a base di nan propio
eksperenshanan
20.15: Palabra di konklushon di Presidente di Plataforma Sklabitut i Herensia di Sklabitut,
drs. Frank Quirindongo
20.20: Kanto di Aemy (Niafeliz)
=================