Parlamentario Gilbert Doran: Artistanan estranhero na Kòrsou

Artistanan estranhero na Kòrsou

Nos a tuma nota den prensa lokal, ku tin un desaroyo no korekto ta tumando lugá, kaminda algun músiko estranhero ta laborando na Kòrsou, ku òf sin pèrmit, kitando pan di e músikonan yu di Kòrsou.

Nos ta lamentá e situashon aki, ya ku farándula di Kòrsou, ta pasando momentonan difísil i e oportunidatnan ku tin mester keda protehá pa nos yunan di tera. Si na paisnan bisiña, manera Santo Domingo, Venezuela, Puerto Rico i otro paisnan nan konstatá artistanan ilegal, outoridatnan ta kai aden ku konsekuensianan hopi serio.

Nos ta konsiente ku direktiva di Asosashon di Músiko “Amak”, tambe ta hasiendo su máksimo esfuerso pa kombatí e situashon inkorekto aki, pero a yega e momento ku mester establesé un forma ofisial, kaminda “Amak” den estrecho kolaborashon ku Imigrashon, por tuma akshonnan konkreto den e asuntu aki.

Nos ta kere tambe ku den kuadro di lei mester ban wak, kon por fortifiká e posishon di Amak den futuro serkano.

Nos komo miembro di parlamento i tambe formando parti di komishon enkargá ku asuntunan di kultura lo hasi uso di nos hèrmèntnan parlamentario, pa e atenshon nesesario wòrdu duna na e tema dor di e titular di hustisia.

Atentamente,

sr. Gilbert Doran
Miembro di Parlamento
Frakshon di MFK