Kaptura di “Cuchi” na Sint Kitts

July 30, 2017 REDAKSHON

Departamentu Polisial di Sint Maarten, Ministerio Publiko di Sint Maarten i Minister di Hustisia di Sint Maarten ta konfirmá kaptura i aresto di Kathron Fortune mihó konosí komo “Cuchi” despues di a risibí informashon di Kuerpo Polisial Real di Sint Kitts and Nevis. E aresto a tuma lugá djasabra 29 di yüli riba isla di Sint Kitts. Minister di Hustisia a keda informá di e desaroyo nobo aki i Departamentu Polisial i ofisina di Ministerio Publiko ta informá komunidat kompletu ku nan ta sigui ku investigashon riba huida di e konvikto ekstremadamente peligroso aki. ” Cuchi” a hui na febrüari di aña 2016 na Sint Maarten kaminda e tin ku sinta un kastigu di 21 aña pa asesinato kometé na aña 2008 na Sint Maarten. Mas detaye i otro informashon tokante e aresto di “Cuchi” no ta disponibel na e momentu aki. Asina e informashon aki ta disponibel, esaki lo keda suministrá.