Kònsùl General di China a realisá un bishita di trabou na Parlamento
Kònsùl General di China a realisá un bishita di trabou na Parlamento
Djabièrnè mainta dia 4 di ougùstùs 2017 E Kònsùl General di China stashoná na Kòrsou sr. Zhang Weixin i Kònsùl sra. Pei Yajuan a realisá un bishita di trabou na Parlamento di Kòrsou. Nan a ser risibí pa Presidente di Parlamento sr. William Millerson i e Grefir di Parlamento mr. Silvin Cijntje. Durante e bishita aki e dignatarionan a follow up den nan kombersashon riba vários tópiko entre kual prevenshon di krímen den e komunidat di komersiantenan Chines establesé aki na Kòrsou. E desaroyonan ku tin andando rondó di e kompania estatal di China Guandong Zhenrong pa invertí den e ekonomia di nos pais. E Kònsùl di China sr. Zhang Weixin a lansa e proposishon pa Miembronan di Parlamento mes tuma nota di e instalashonnan di Guandong Zhenrong aya na China. A deliberá riba e posibilidat pa kuminsá stimulá e posibilidatnan pa suidadanonan dje Repúblika Popular di China bishita Kòrsou komo turista. Na final dje bishita aki ámbos dignatario a hasi entrega di opsekionan na nòmber dje komunidat ku nan ta representá.
Deskripshon dje potrèt: di robes pa drechi Grefir di Parlamento mr. Silvin Cijntje, Presidente di Parlamento sr. William Millerson, Kònsùl General di China na Korsou sr. Zhang Weixin i Kònsùl sra. Pei Yajuan