Parasasa ‘Beach’ lo ta aksesibel atrobe próksimo wikènt!

Parasasa ‘Beach’ lo ta aksesibel atrobe próksimo wikènt!

Willemstad- Djamars 24 di aprel Minister Zita Jesus Leito a tuma e desishon ofisial pa solushoná e problema di e barankanan ku tabata stroba aksesibilidat pa usuarionan di Parasasa ‘Beach’. Den kuadro di esaki, pa medio di e servisio di Ministerio di VVRP responsabel, Domeinbeheer, el a entregá un karta ofisial na ITC Hotel Management N.V. (ITC) ku e instrukshon pa pone e playa bèk den su estado original mas pronto posibel.

 

Seguidamente, el a enkargá su departamentunan pa ehekutá su desishon debidamente. Durante un reunion entre Domeinbeheer, Openbare Werken (OW), Ruimtelijke Ordening en Planning (ROP), Maritieme Autoriteit Curaçao (MAC), ITC i World Trade Center (WTC), ku sosten di Ministerio di Gezondheid, Milieu en Natuur (GMN) a palabrá konhuntamente ku lo saka e barankanan bèk for di e laman, nivelá e superfisie i pone santu nobo riba dje, di moda ku pueblo por disfrutá libremente di e laman atrobe. E trabou aki lo dura dos dia, pues pa wikènt e laman lo ta aksesibel atrobe.

 Dia 29 di mart pueblo di Kòrsou a bati bèl serka Domeinbeheer indikando ku deskonosínan ta butando baranka den e laman na Parasasa, strobando akseso liber. Mesora e tim di Okupashon Ilegal & Mantenshon di Òrdu a akudí na e sitio i para e akshonnan ya komo ku no tabatin e pèrmitnan nesesario pa por hasi e trabounan. Investigashonnan a mustra ku e trabounan tabata tumando lugá bou di guia ITC ku e meta pa drecha e laman pa turistanan i habitantenan lokal. ITC ta e organisashon ku tin un akuerdo ku Gobièrnu pa mantenshon di e playa i nan intenshon tabata pa hala e liña di kosta mas afó.

Sinembargo, Minister Jesus Leito a indiká ku pa por hasi esaki mester kana e kaminda korekto i pidi e pèrmitnan nesesario promé. Pues, ITC mester pone e playa bèk den su estado original mas pronto posibel. Pa wikènt e playa mester ta kompletamente aksesibel atrobe pa usuarionan.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: