Segun pronóstiko, Temporada di orkan 2018 ta bira ménos aktivo kompará ku 2017

Segun pronóstiko,
Temporada di orkan 2018 ta bira ménos aktivo kompará ku 2017

Willemstad – E último perspektiva pa e temporada di orkan benidero, emití pa Colorado State University, ta indiká ku e aña aki diestres (13) tormenta tropikal ta forma den e region di Atlántiko (parti nort di Osean Atlántiko, Laman Karibe i Golfo di México). Seis (6) di nan ta premirá ku ta sigui desaroyá bira orkan i dos (2) di nan, orkan fuerte (kategoria 3 òf mas). E aktividat e aña aki lo ta kasi igual na e promedio di diesdos (12) tormenta, 6.5 orkan i dos orkan fuerte (kategoria 3 te 5).

Pa Kòrsou, temporada pasá a kuminsá hopi trempan, ora ku for di 18 di yüni for di un ola tropikal aktivo a desaroyá tormenta tropikal Bret. Durante di atardi di 20 di yüni Bret a degenerá den un ola tropikal i e mesun anochi ei e sistema aki a pasa riba Kòrsou. Bientu temporalmente a lanta bastante riba nos isla i a kousa daño na algun kaminda. E stashon outomátiko di Meteo riba Seru Kokori a midi e anochi ei un ráfaga di bientu di 90 km/ora ku ta igual na forsa di un tormenta tropikal fuerte.

Orkan Irma a forma na fin di ougùstùs i bira un orkan super peligroso di kategoria sinku (5) i a pasa ku su wowo presis over di Sint Maarten dia 6 di sèptèmber. Ounke e kantidat di morto riba e isla aki afortunadamente tabata limitá, e daño material sin embargo tabata ekstenso. E stashon meteorológiko di Servisio Meteorológiko di Sint Maarten (MDS) na airopuerto a sufri daño serio. Den e kuadro di koperashon Meteo Kòrsou a manda un stashon portátil pa asistí Meteo Sint Maarten. Ku esaki aviashon komersial por a reanudá su buelonan.

Dia 10 di sèptèmber 2017 Kòrsou a risibí bishita di nos hefe di estado, Su Mahestat Rei Willem-Alexander. El a bishitá Meteo pa tuma informashon ofisial riba impakto di orkan Irma na Islariba. Ademas di esei el a haña un “briefing” di wer pa Islariba, en konekshon ku su bishita einan su manisé.

Den estrecho koperashon ku Sentro Nashonal di Orkan na Miami, Meteo lo monitoreá tur siklon tropikal ku ta forma menasa pa su region di responsabilidat ku ta e espasio aéreo i tambe e laman ku ta rondoná nos isla. Segun ta nesesario Meteo lo kuminsá ku emití boletinnan di informashon pa siklon tropikal (kódigo hel) 120 ora (sinku dia) promé ku un posibel menasa na papiamentu, hulandes i ingles. E mensahenan aki tin un kódigo di koló, pa ilustrá e seriedat di e menasa.

E nòmbernan reservá pa e tormentanan tropikal i orkan di e aña aki ta: Alberto, Beryl, Chris, Debby, Ernesto, Florence, Gordon, Hélène, Isaac, Joyce, Kirk, Leslie, Michael, Nadine, Oscar, Patty, Raphael, Sara, Tony, Valerie i William. E aña aki tambe nos tabatin un komienso trempan di temporada ku desaroyo di Tormenta Subtropikal Alberto. Esaki a forma dia 25 di mei den área di Yucatán, México.

Servisio Meteorológiko komo e instansia ofisial di Kòrsou, ta rekordá tur hende, sin importá ku ta un temporada trankil òf aktivo, pa den kaso di menasa di mal tempu i siklon tropikal konsultá solamente mensahenan ofisial. Esakinan ta disponibel riba Meteo su website (www.meteo.cw), naturalmente via di Departamento di Komunikashon i Informashon di Gobièrnu.