Minister Xiomara Ruiz-Maduro ta informa: IMF ta na Aruba pa nan ‘Article IV mission’
Minister Xiomara Ruiz-Maduro ta informa:
IMF ta na Aruba pa nan ‘Article IV mission’
ORANJESTAD – E trabaonan ta sigui na bienestar di nos Pais. Hunto cu Minister President Sra. Evelyn Wever-Croes, Minister di Finansa, Asuntonan Econiomico y Cultura Sra. Xiomara Ruiz-Maduro a reuni cu ehecutivonan di IMF pa nan ‘Article IV mission’ di nos Pais. Durante e bishita aki di IMF, Aruba su sistema fiscal y nos economia ta wordo evalua. Minister President y Minister di Finansa, Asuntonan Economico y Cultura a pasa den e cambionan cu Gabinete Wever-Croes ta haciendo pa trece bek stabilidad financiero pa nos Pais. A splica, entre otro, riba e caminda cu gobierno actual a scohe pa cana den e Memorandum Financiero Economico cu a forma base pa yega na un Protocol nobo cu Hulanda, e fasenan di e reforma fiscal pa nos Pais, e efecto di Venezuela pa nos Pais y e trabaonan cu ta wordo haci riba e tereno economico di nos Pais. E dianan nos dilanti IMF lo reuni cu varios departamento di Gobierno y otro instancianan, gremio y sindicato riba e situacion financiero y economico di nos Pais. Na final di e siman Ministernan Wever-Croes y Ruiz-Maduro lo bolbe reuni cu IMF pa por haya un bista preliminario di nan evaluacion y recomendacionnan pa Aruba.
