Prome Minister Evelyn Wever-Croes: Durante celebracion di ArubaDag: PROME MINISTER A MANDA MENSAHE DI VIDEO PA NOS ARUBANONAN NA HULANDA
Prome Minister Evelyn Wever-Croes:
Durante celebracion di ArubaDag:
PROME MINISTER A MANDA MENSAHE DI VIDEO PA NOS ARUBANONAN NA HULANDA
“Aruba mester di bo, sea ta na Aruba of na Hulanda”
Un biaha mas, Arubanonan residencia na Hulanda a celebra ArubaDag na un manera grandioso. E aña aki a kibra tur expectative no solamente cu e cantidad record di participante den hopi aña pero tambe a sa di reduci gasto masha hopi mes. E meta di Gabinete Wever-Croes ta pa haci ArubaDag un manifestacion cultural pa celebra nos Himno y nos Bandera y no un concierto manera a sosode bou di e gobierno anterior. Asina aki, Gobierno ta brinda cada Arubano cu ta studia na Hulanda y esnan cu pa un of otro motibo ta biba na Hulanda, un bunita celebracion.
Como cu Prome Minister Evelyn Wever-Croes no tawata presente na Hulanda pa ArubaDag, a dicidi e aña aki tambe pa manda su mensahe di video pa asina e wordo pasa durante e celebracion na unda cu el a duna bon bini na tur presente y gradici nan pa un aña mas engrandece e celebracion di ArubaDag.
Prome Minister a enfatisa riba e letranan di e tercer couplet di nos Himno cu, segun Prome Minister, ta contene e esencia di nos ser: Grandesa di bo pueblo ta, Su gran cordialidad. Cu Dios por guia y conserva, Su amor pa libertad.
“Laga nos reflexiona riba e palabranan aki. E cordialidad di nos pueblo, E amor pa libertad. Unda cu bo ta, laga esey ta bo guia”.
Prome Minister a tuma e oportunidad tambe pa invita nos hendenan na Hulanda pa registra na e plataforma District 297 via e pagina di Facebook y asina keda na altura di e ultimo desaroyonan di nos dushi Aruba.
“Nos vision como Gobierno ta pa pone e ser humano central y esaki kiermen, ‘leave no-one behind’, tampoco nos Arubanonan cu ta afo. Mi kier recorda bo cu unda cu bo ta na mundo, abo ta un embahador di nos dushi Aruba. P’esey, unda cu bo ta, carga nos nomber cu orguyo. Y laga e letranan di nos himno Aruba Dushi Tera inspira bo pa bo ta e miho cu bo por ta den tur locual cu bo ta haci. Aruba mester di bo, sea ta na Aruba of na Hulanda”, tawata palabranan expresa pa Prome Minister Evelyn Wever-Croes.