Minister Xiomara Ruiz-Maduro: Aruba a ricibi un evaluacion positivo di nos situacion economico financiero di IMF Nos ta sigui traha duro pa haya e credibilidad financiero cu nos pais Aruba merece.

Minister Xiomara Ruiz-Maduro:

Aruba a ricibi un evaluacion positivo di nos situacion economico financiero di IMF

Nos ta sigui traha duro pa haya e credibilidad financiero cu nos pais Aruba merece

 

ORANJESTAD – Minister di Finansa, Asuntonan Economico y Cultura a informa durante di un Conferencia di Prensa dialuna cu Pais Aruba a ricibi un rapport preliminar positivo di e expertonan di e Fondo Monetario Internacional (IMF).

Den e rapport aki cu IMF a publica riba nan website dialuna, pais Aruba a ricibi un evaluacion positivo di nos situacion economico financiero. Esaki ta hopi importante pa nos pais, ya cu e ta mustra cu nos ta riba e bon caminda pa nos pais haya e credibilidad financiero cu nos mester.

IMF a basa su evaluacion riba e Memorandum Financiero Economico (FEM) den cual gobierno di Aruba a delinea locual mester wordo haci pa recupera e credibilidad financiero di nos pais. Tambe IMF a evalua e Presupuesto 2018/2019 di pais Aruba den cual gobierno a scohe prudentemente pa un crecemento economico di 1%.

IMF a premira un crecemento economico financiero di 2.4%, cual ta hopi mas di locual gobierno mes a premira. Esaki ta mustra cu pais Aruba ta riba bon caminda. E esfuersonan, trabaonan cu ta ser haci ta dunando resultado. Ademas IMF ta haci mencion tambe riba e diversificacion di economia, e seis sectornan prometedor di nos maneho economico cu pronto lo wordo lansa den publicidad. E confiansa den e parti economico tey, Banco Central di Aruba den su ultimo rapport tambe a publica cu e confiansa di consumidor ta subiendo.  Riba Reforma Fiscal IMF a duna su elogio paso esaki ta mustra cu gobierno ta trahando seriamente riba e parti financiero. IMF a elogia gobierno tambe riba e manera cu gobierno ta hiba e maneho di debe.

E mandatario a yama danki na na tur departamento y instancianan cu tabata involvi den preparacion di informacion pa e evaluacion di IMF por a tuma lugar. E expertonan di IMF a gradici pa e tremendo cooperacion cu nan a haya pa por a haci nan evaluacion.

Minister Xiomara a subraya cu e rapport preliminar di IMF a sali positivo pa pais Aruba. Esaki ta demostra cu nos ta bayendo cu paso chikito pero hopi sigur padilanti. Nos ta sigui traha diligentemente segun e Memorandum Financiero Economico, un plan realistico traha door di nos mes expertonan. Nos ta convenci cu poco poco pero sigur nos lo yega na solucionannan pa nos pais, e mandatario a termina bisando.