Prome Minister Evelyn Wever-Croes: Discurso di Prome Minister na encuentro di Universidad di Aruba: VISION DI GABINETE WEVER-CROES RIBA INTEGRIDAD TA UN COMPROMISO CU TA WORDO LOGRA
Prome Minister Evelyn Wever-Croes:
Discurso di Prome Minister na encuentro di Universidad di Aruba:
VISION DI GABINETE WEVER-CROES RIBA INTEGRIDAD TA UN COMPROMISO CU TA WORDO LOGRA
Desde cu Gabinete Wever-Croes a asumi mando na final di 2017, Gobierno ta trahando riba un trayectoria di Integridad. IMF recientemente a elogia masha hopi e vision di Integridad di Gobierno. Universidad di Aruba e siman aki, a organisa un encuentro bou di e Good Governance and Integrity Institute. Ta trata di instituto di Bon Gobernacion y Liderazgo na Universidad di Aruba na unda cu Prome Minister Evelyn Wever-Croes tawata e orado pa entrega e discurso principal na unda cu el a duna di conoce cu Integridad ta un caminda cu e ta canando pa 5 aña caba desde oposicion. E tempo ey, Prome Minister a skirbi e nota di Integridad cu e titulo: ‘Integriteit, het juiste doen ook als niemand kijkt’.
E intencion di e nota aki tawata pa pidi atencion pa e kiebronan di integridad na Aruba y kico ta e stapnan cu mester haci pa cana den e caminda di integridad. Den e nota Prome Minister a haci un inventarisacion tambe di tur e leynan cu falta na Aruba.
“For di oposicion no tawata facil logra algo y te hasta tawata hopi frustrante pasobra e Gobierno na mando e tempo ey y mayoria den Parlamento, no tawata tin interes pa cana e caminda di integridad”.
Awo, como Promo Minister di pais Aruba, ta un honor p’e, Prome Minister a expresa, pa pone den practica y pa traha riba tur locual e mes a pone como vision den e nota. Ta e vision aki, Prome Minister a comparti den su discurso na Universidad di Aruba. Y esaki ta basa riba tres pilar: Bureau Integriteits Aruba, Oficina di Integridad; Integriteitskamer, Camara di Integridad; Corporate Governance Code, Codigo Corporativo di Gobierno.
- BUREAU INTEGRITEITS ARUBA: OFICINA DI INTEGRIDAD
Oficina di Integridad lo percura pa aumenta conscientisacion prome den sector publico y despues den sector priva. Conscientisacion di kico por y kico no por, kico por acepta y kico no por acepta cu lo por haci cu un hende por perde nan trabou. E oficina aki lo fungi tambe como e punto caminda hende por yama y raporta kiebronan di integridad. Bureau Integriteits ya a wordo institui y e prome kehonan lo cuminsa wordo ricibi asina cu tin un director y tur personal disponibel. Tin placa den presupuesto pa Bureau Integriteits e aña aki y ta spera cu den e siguiente simannan e oficina aki cuminsa funciona.
- INTEGRITEITSKAMER, CAMARA DI INTEGRIDAD: CAMARA DI INTEGRIDAD
Esaki ta bay ta e comision cu ta bay scrutina e desicionnan di Gobierno, especialmente den e destahonan publico. Prome cu Gobierno duna un destaho publico, Camara di Integridad lo revisa pa wak si e procedura a bay segun tur principio y reglanan di bon gobernacion y lo duna conseho na Gobierno. Nan lo vigila si tur cos ta cana segun regla, den transparencia entre otro.
- CORPORATE GOVERNANCE CODE: CODIGO CORPORATIVO DI GOBIERNO:
Esaki ta inclui cu lo bin un codigo uniforme pa tur companianan estatal y pa companianan semi-publico. Tambe lo bin un organo pa supervisa cu e companianan estatal ta mantene nan mes na codigo di conducta y etica. E di tres pilar aki a wordo planifica pa keda cla e siguiente aña. Nan lo conseha Gobierno den apuntamento di miembronan den hunta di comisario. Esaki ta trece un miho bista y control pa loke ta trata companianan estatal.
Cu e tres pilarnan aki, Prome Minister a enfatisa, lo permiti Gobierno ratifica e tratado contra corupcion di Nacionnan Uni cu te ainda Aruba no a ratifica riba dje.
“Esaki ta vision di Gabinete Wever-Croes. Y ki oportunidad cu mi haya, mi ta trece e vision aki dilanti. Y sigur, mi ta honra di trece nos vision na e instituto aki di Universadad cu ta encarga cu bon gobernacion y liderazgo. No solamente mi ta papia di nos vision pero mi ta traha duro y ta comprometi pa logra tur tres pilar pa sigura integridad den companianan estatal, den companianan semi-publico y den Gobierno”, Prome Minister a duna di conoce.
