Prome Minister Evelyn Wever-Croes: Prome Minister a reuni cu Directiva di Club Kibrahacha 60+ OUDERENRAAD TAWATA E TEMA DI DISCUSION PRINCIPAL
Prome Minister Evelyn Wever-Croes:
Prome Minister a reuni cu Directiva di Club Kibrahacha 60+
OUDERENRAAD TAWATA E TEMA DI DISCUSION PRINCIPAL
Durante siman, Prome Minister Evelyn Wever-Croes a reuni cu Directiva di Club Kibrahacha 60+. Den e reunion nan a haci un presentacion bastante elabora di e trabounan y e nificacion cu Club Kibrahacha tin pa nos comunidad di riba 60 aña.
Mas o menos 20 aña pasa, e bishitantenan di e Club tawata yega cu varios problema incluyendo di mobilidad. Nan tawata cana cu dificultad y tawata rekiri mas yudansa y cuido. Awendia, nos hendenan di riba 60 aña ta yega e club den keds y jeans, basta confortabel y entusiasma pa enfrenta tur e retonan di dia. Cu tempo, e club a bin ta adaptando loke e ta ofrece na nos ciudadanonan di 60 aña pa riba. Club Kibrahacha 60+ tin diferente plan pa futuro pa ofrece mas ainda na nos grupo di ciudadano aki.
Prome Minister a keda hopi impresiona cu e forma organisa y structura cu Club Kibrahacha 60+ ta atende cu nos ciudadanonan di 60+. A yega na palabracion cu Gobierno hunto cu e club lo alinea esfuersonan teniendo e meta comun pa tur nos grandinan na Aruba tin un senectud contento, caminda cu despues cu nan bira pensionado y stop di traha nan no mester tin preocupacionnan inesesario.
Tambe Prome Minister a toca e tema di Ouderenraad cu ta un vision hopi importante pa Gabinete Wever-Croes cu ta den fase di wordo cumpli.
Na final di e reunion, tanto Prome Minister como e Directiva di Club Kibrahacha 60+ a keda hopi satisfecho con e reunion a bay y e plannan y ideanan cu a wordo treci dilanti. Pa Gabinete Wever-Croes, nos grandinan ta importante y Gobierno ta desea di uza nan conocemento y experticio na bienestar di nos ciudadanonan di 60+.
