Riba “Play True Day”/ Dia pa Deporte Limpi, a instalá miembronan di C-NADO Curaçao!
Riba “Play True Day”/ Dia pa Deporte Limpi, a instalá miembronan di C-NADO Curaçao!
WILLEMSTAD – Riba 10 di aprel anualmente ta selebrá e dia pa kòrda un i tur ku mester hunga deporte limpi: Play True Day!
“Play True Day” su intenshon ta pa lanta konsiensia bou di atletanan, e públiko ku ta praktiká deporte i otronan, tokante e lucha global kontra dopahe, esta e uso di supstanshanan prohibí den deporte.
E inspirashon pa e inisiativa a sali for di un konferensia di e organisashon World Anti-Doping Agency /WADA den 2013.
UNESCO (gobernamental) a join WADA den e lucha antidopahe den e mundu deportivo i pa medio di e Tratado Antidopahe den Deporte a definí e direkshon ku paisnan ta sigui den e lucha antidopahe.
WADA (no-gobernamental) na su turno a sòru pa den tur region instalá RADO’s, organisashonnan regional pa vigilá e proseso pa hasi deporte limpi i sòru pa programanan pa evitá e uso di supstanshanan prohibí.
Esei ta enserá ku kada pais mester sòru pa nan tin un organisashon nashonal pa ehekutá e programanan den e lucha kontra uso di supstanshanan prohibí.
Den e kuadro aki Minister di Enseñansa, Siensia, Kultura i Deporte sra. Marilyn Alcalá-Wallé a rekonosé e outoridat antidopahe na Kòrsou, C-NADO, ku ofisialmente ta keda enkargá ku e trabounan pa krea i mantené deporte liber di uso di supstanshanan prohibí.
E konstelashon di C-NADO entrante 10 aprel 2019 ta:
– Ruthsel Gregorio Martina, miembro FDOK/DCO (Doping Control Officer)
– Glyselle Eustatia Hanst-Bentura, DCO
– Edsel Simon Cominencia, DCO
– Ellis Francisco Davelaar, eksperto hurídiko
– Ramfis Rafaël Fillet, eksperto médiko
– Mark Arturo Porfirio Elias Curiel, DCO