Preguntanan hasi konforme nos Areglo di Estado i di Reglamento di Orden di Parlamento ku no ta wòrdu kontesta pa Ministernan di gabinete Rhuggenaath
Willemstad, 12 di aprel 2019
Na: Presidente di Parlamento
Señor W. Millerson
Wilhelminaplein # 4
PRESENTE
Tópiko: Preguntanan hasi konforme artíkulo 57 di nos Areglo di Estado i artíkulo 96 di Reglamento di Orden di Parlamento ku no ta wòrdu kontesta pa Ministernan di gabinete Rhuggenaath
Señor Presidente,
Konforme artíkulo 57 di nos Areglo di Estado i artíkulo 96 di Reglamento di Orden di Parlamento, miembronan di Parlamento di Kòrsou tin e derechi komo e órgano pa kontrolá gobiernu pa hasi Ministernan pregunta.
Dia 20 di ougùstùs 2013, Parlamento i Gobiernu di Kòrsou ta firma un protokòl kaminda ta ankra e derechi di hasi pregunta dor di miembronan di Parlamento, pero tambe e derechi ku Ministernan tin pa kontesta e preguntanan hasi.
Konforme artíkulo 3 di e protokòl, Ministernan mester kontesta preguntanan hasi na nan den un término di 2 luna (60 dia). Den kaso ku e Minister no por kontesta e preguntanan e Minister mester informá Presidente di Parlamento por eskrito i mester menshoná pa ki motibu e preguntanan no por wòrdu kontesta, esaki konforme artíkulo 4 di e protokòl.
Frakshon di MFK ta konstatá ku tin kartanan ku preguntanan hasi na Ministernan di gabinete Rhuggenaath ku Ministernan no a kontesta nos frakshon e preguntanan ku nos a hasi na nan, esaki ta un violashon di e protokòl.
Nos ta konstatá ku tin;
- 1 karta ku a surpasá 700 dia sin haña kontestá
- 5 karta ku a surpasá 500 dia sin haña kontesta
- 4 karta ku a surpasá 300 dia sin haña kontesta
- 6 karta ku a surpasá 200 dia sin haña kontesta
- 1 karta ku a surpasá 100 dia sin haña kontesta
- 3 karta ku a surpasá 60 dia sin haña kontesta
Nos a tuma nota ku Presidente di Parlamento ta mantené su mes na artíkulo 5 di e protokòl aki, ku ta indiká ku Presidente di Parlamento mester manda un karta pa gobiernu kada 3 luna ku un lista di e preguntanan ku a wòrdu hasi dor di Parlamentarionan i tambe kontestanan risibí i preguntanan ku tin mas ku 3 luna sin ku nan a wòrdu kontesta. Pero e karta aki di Presidente di Parlamento, aparentemente no ta sufisiente pa gabinete Rhuggenaath kumpli ku e protokòl menshoná
Pa medio di esaki frakshon di MFK kier pidi Presidente di Parlamento, pa aserka gobiernu di Kòrsou riba nan inkumplimentu ku e protokòl i tambe pa kontesta preguntanan hasi dor di frakshon di MFK ku ta riba e lista athunto ku ya a surpasá e 60 dia den kual nan mester duna kontesta.
Atentamente,
Jacinta Constancia
Parlamentario pa frakshon di MFK
