RESUMEN DI SIMAN GABINETE WEVER-CROES, 8 – 14 APRIL 2019

RESUMEN DI SIMAN GABINETE WEVER-CROES, 8 – 14 APRIL 2019

✓ Nos a reuni cu Minister di Relacion Interior di Hulanda Kajsa Ollongren y Secretario di Estado Raymond Knops den cual a toca varios topico, entre otro finansas di nos pais, e avansenan pa optimilisa siguridad di nos frontera y ful nos isla, esfuersonan cu ta wordo haci pa por construi un KIA nobo, e retonan y efectonan di e situacion alarmante na Venezuela.

✓Finalmente a haci un bishita na e centro di Guarda nos Costa, caminda e mandatarionan por a constata cu e facilidad ta den bon condicion y cu e trato di personanan ta optimal. Na final di e bishita tanto Minister Ollongren como sr. Knops tabata tin palabranan di elogio pa Gabinete Wever-Croes, cu apesar di tur e retonan, ta tumando e decisionnan necesario pa hiba Aruba padilanti, poniendo e ser humano central.

✓ Nos a reuni cu Minister di Corsou, Zita Jesus-Leito riba temanan en comun y con por traha mas hunto pa yuda e pueblonan di Aruba y Corsou. Locual cu a resalta ta e tremendo interes cu Minister Jesus-Leito tabatin riba e manera cu Aruba ta acerca diferente tema y a indica cu tin e intencion y deseo pa traha hunto cu Aruba pa regionalmente reforsa e maneho pa locual ta e diferente temanan relaciona cu desaroyo teritorial.

✓ Siman pasa nos a introduci un proyecto di e-Crisismanagement “Raven” na Bureau Rampen Bestrijding, creando un plataforma digital internacional, pa por haya informacion hopi mas confiabel y mas lihe durante un crisis y asina por tuma accion mas rapido.

✓ Nos a anuncia e prome proyecto piloto di e-Learning pa aña escolar nobo na e scol basico Cacique Macuarima, cu lo inclui digitalisacion den enseñansa y airco pa e scol.

✓ Studiantenan di nos Universidad a bishita Bestuurskantoor pa haya mas informacion di gobernacion y e vision di Integridad y Bon Gobernacion di Gabinete Wever-Croes.

✓ E ley di sistema di placa a cambia, pa asina permiti Banco Central emiti biyetenan nobo. Tambe a bin cu reglanan mas estricto pa combati labamento di placa na Aruba.

✓ Nos a reuni cu sindicatonan SADA TOPA SEPPA y SPA tocante entre otro indexering, y bashipremie y reparatietoeslag pa pensionadonan, den un bon esfera.

✓ Trabounan grandi a tuma luga riba caminda principal di Santa Cruz, cu ya pa hopi aña tabata den mal estado y tabata mester un mantencion; awo comunidad por mira cu fondo pa drecha nos camindanan realmente ta wordo utilisa pa cumpli cu e necesidad cu tin den comunidad. E trabounan a tuma luga anochi pa causa menos molester na automobilistanan.

✓ E siman aki Gobierno a duna un presentacion di e asina yama “Aruba Property Funds” na comision permanente di infrastructura den Parlamento. Ta trata aki di un entidad nobo, di Gobierno, cu lo mester  keda encarga cu e maneho di edificionan y scolnan bandona di Gobierno.

✓ Recientemente a anuncia e inicio di e restauracion di e edificio di Uncle Louis Store pa e departamento di Naturalesa y Medio Ambiente (DNM) wordo ubica den e edificio. Esaki ta muestra di e compromiso cu tin di parti di Gabinete Wever–Croes pa sigui stimula economia pariba di nos isla.

✓ Unit di tecnologia di EPI a tene un ‘Science fair’ cu tabata exitoso, y a conta cu presencia di mandatario di Gabinete Wever-Croes.

✓ E Plan Educacion Nacional 2030 (PEN) a keda presenta na stakeholders.

✓ Varios scol a participa den Arte di Palabra, esaki ta duna realce na Papiamento.

✓ Nos a firma acuerdo cu universidadnan di Florida cu ta ofrece na nos studianten tarifa local, y cu ta haci posibel nos studiantenan por studia cu Arubalening na e universidadnan aki cu antes no tabata accesibel pa hopi.

✓ Setar a tene su prome Youth Tech Event y esaki a bay enfoca riba agricultura. Di e manera aki SETAR NV ta duna bek na nos comunidad door di incentiva nos hobennan pa ta creativo y traha proyectonan innovativo cu lo por sirbi nos pais.

✓ Hurricane Hunter Hercules tabata di bishita na Aruba, cu a conta cu presencia di Minister Zita Jesus-Leito di Corsou y alumnonan di varios scol MAVO.

✓ Nos a organiza un bunita evento pa honra y reconoce deportistanan cu a destaca durante aña 2018. Premio excelencia den deporte a resulta di ta un evento hopi extiso caminda por a mira alegria den cara di nominadonan y ganadornan.

✓ Nos ta busca turistanan di calidad y pa nos busca e turistanan aki nos mester tin un producto di calidad. Nos a anuncia algun luna atras e Proyecto “Upgrading Weg Brickell Bay” cu ta encera, pone trottoir nobo, embeyece e area y pone iluminacion na e parkeerplaats. Actualmente nos ta den e ultimo fase di e proyecto y proyecta pa entrega fin di april 2019.

✓ Minister Dangui Oduber a anuncia señor Joost Meijs como proximo CEO di AAA NV. Lo cuminsa e proceso pa busca un Arubiano pa traha banda di sr. Meijs pa ocupa e funcion despues di señor Meijs considerando e hecho cu a yega e momento pa pais Aruba apunta un Arubiano como CEO pa maneha nos aeropuerto. Schiphol a compromete pa asisti den e trayecto aki cu curso y training, si ta necesario.

✓ Gobierno a brinda un homenahe na señora Gloria Croes pa su trabou incansabel pa tene e memoria bibo di nos Libertador Betico Croes, y pa su casi 50 aña dedica na educa nos hobennan den enseñansa.

✓ Minister di Finansa y Economia a participa e siman aki na IMF Spring Meetings na Washington. Na e Spring Meetings aki ta participa mas cu 2800 delegado di paisnan cu ta miembro.  Entre otro, ehecutivonan di banco, ministernan di finansa y desaroyo, parlamentarionan y ehecutivonan di sector priva, academico y periodistanan pa discuti problemanan na interes mundial, perspectivanan economico mundial, eliminacion di pobresa, desaroyo economico y e efectividad di yudansa. Minister Ruiz-Maduro a reuni tambe cu e team di IMF cu ta evalua nos Pais y a reuni tambe cu ehecutivonan di Banco Mundial pa por haya nan sosten y yudansa pa creacion di capacidad pa Aruba. E tipo di reunionnan aki ta crea aliansanan fuerta pa yuda nos pone Aruba riba e bon rumbo pa finasas responsabel.