PARLAMENTO Komunikado relashoná ku biahe di trabou na Hulanda
Djasabra dia 13 di Aprel 2019 un delegashon Parlamentario di Aruba, Kòrsou i Sint Maarten a biaha pa Hulanda. Algun ora despues di nan yegada e delegashonnan Parlamentario a reuní pa planifiká e siman di trabou i kon ta bai atendé ku e sitanan i kòmbersashonnan ku tin planiá riba agènda pa ku e bishita di trabou aki.
E biahe di trabou aki ta konsentrá na hiba deliberashonnan ku vários instansia Ulandes pa logra ku ta pasa e proposishon di lei di Areglo di Disputa den Reino e asina yama “Geschillenregeling” ku otro luna den Parlamento Ulandes ”Tweedekamer” ta bai tin votashon riba dje.
E motibu prinsipal pa a bai Ulanda ku tres delegashon Parlamentario pa hiba e deliberashonnan aki ta pa di un forma unifiká i trahando den gruponan konsistiendo di miembronan di tur tres delegashon Parlamentario nan topa, reuní i deliberá ku mas tantu di nan koleganan di Parlamento Hulandes ku ta posibel.
Di e manera aki e tres delegashonnan Parlamentario lo trata di konvensé nan koleganan Hulandes ku argumentunan intensamente studiá pa pasa un lei di Reino den kua interes di e paisnan den Karibe ku ta parti di a Reino Ulandes ta wòrdu respetá i salvaguardá konforme e Statüt.
E proposishon di lei di disputa ku aktualmente ta wòrdu konsiderá no ta kumpli ku e deseo di e paisnan Kòrsou, Aruba i Sint Maarten. Deseonan ku a keda fórmula desde 2015 i den forma históriko a wòrdu aprobá den Parlamento Hulandes mediante di un moshon di parlamentario Hulandes sr. van Laar na 2016. E motibu pa kual e miembronan dje delegashonnan di Parlamento di Kòrsou, Aruba i Sint Maarten mester konvensé nan koleganan Hulandes di nan vishon pasobra Parlamentarionan di e islanan Karibense no por vota den un tratamentu di lei den Parlamento Hulandes. P’esei mester deliberá ku Parlamentarionan i frakshonnan mas tantu ku ta posibel pa nan vota na fabor di un amienda ku e islanan lo introdusí ku lo kambiá e proposishon di lei aktual pa unu ku si ta karga aprobashon i sosten di e Parlamentonan di Kòrsou Aruba i Sint Maarten.
E konvikshon entre e delegashonnan ta ku despues di 9 aña no por warda mas pa introdusí un “Geschillenregeling” un Areglo di Disputa di Reino pa garantisá un trato igual entre paisnan di Reino a base di e prinsipio di igualdat. Djaluna dia 15 di Aprel miembronan di tres delegashon di Parlamentonan di Kòrsou, Aruba y Sint Maarten konhuntamente a duna inisio na e tarea grandi aki i ta reuniendo ku representantenan di e piasnan den e Konseho Konsultivo di Reino “Raad van State”, un órgano di estado di Reino respetá na Hulanda pa su imparsialidat den konsehonan ku “Raad van Advies” ta emití riba tur leinan na Hulanda i di Reino. E instansia aki tambe ta figura den e vishon ku e islanan tin pa ku ehekushon pa ku e lei dje Areglo di Disputa di Reino, esta e “Geschillenregeling”.
