SENTRO DI DETENSHON I KOREKSHON KORSOU (SDKK) HUNTU KU FUNDASHON SENTRO KULTURAL KORSOU  (CCC) TA BAI INISIA UN PROYEKTO PA TRAHA KA’I ORGEL.

SENTRO DI DETENSHON I KOREKSHON KORSOU (SDKK) HUNTU KU FUNDASHON SENTRO KULTURAL KORSOU  (CCC) TA BAI INISIA UN PROYEKTO PA TRAHA KA’I ORGEL.

En konekshon ku proklamashon di aña 2019 komo “Aña di Ka’i Orgel” dor di gobièrnu di Kòrsou, djabièrnè último, 12 di aprel 2019, den presensia di Ministernan di Hustisia i Enseñansa, Siensia, Kultura i Deporte, SDKK i CCC a firma un akuerdo di koperashon, pa kuminsa un proyekto den kua detenidonan ta bai traha Ka’i Orgel den e instituto.  E kombenio aki ta enserá, ku pa aña 2019 lo traha dos Ka’i Orgel grandi musikal, miéntras ku tambe lo produsí un kantidat di Ka’i Orgel miniatura di material desechabel ku lo keda ofresé komo suvenir. Detenidonan lo por usa nan kreatividat pa traha esakinan i asina partisipá den un kompetensha pa e ka’i orgel mas kreativo. E parti di produkshon/trahamentu lo ta den man di SDKK i pa lokual ta e parti di kordinashon general, tékniko i musikal lo ta den man di instruktornan di Fundashon Sentro Kultural Kòrsou i Museo Ka’i Orgel, ku lo guia e detenidonan den e proseso.  Kas di Kultura tambe lo duna un man den den e proseso di guia.

E seremonia di firmamentu di e akuerdo a tuma luga den e fasilidatnan di e Sentro di Detenshon i Korekshon. Komo akto ofisial señor Urny Floran, direktor di e sentro penitensiario a presenta un modelo di e ka’i orgel miniatura tantu na señor Quincy Girigorie, Minister di Hustisia komo na señora Marilyn Alcalá-Wallé, Minister di Enseñansa, Siensia, Kultura i Deporte.

“Ka’i Orgel ta un parti integral di nos herensia kultural, i teniendo kuenta ku e aña aki nos ta den selebrashon di “Aña di Ka’i Orgel”, Gerensia di SDKK a bin ku e inisiativa pa nos tambe duna un aporte den promoshon di aña di Ka’i Orgel. Komo tal nos a bin ku e idea pa ban laga nos detenidonan traha Ka’i Orgel”, señor Urny Floran, Direktor di SDKK  a indiká. “Ku e proyekto aki SDKK lo habri e posibilidat pa algun detenido por siña e fishi kon pa traha Ka’i Orgel, ademas esaki ta un forma di resosialisashon di e detenidonan, pa ora nan ta bèk den komunidat nan por tin un fishi den nan man. Ya kaba por mira e entusiasmo i interes ku e detenidonan a demostra pa e proyekto, ku den korto tempu a produsi un modelo di un Ka’i Orgel miniatura hopi bunita”.

“Nos ta honrá ku CCC por partisipá huntu ku SDKK den e proyekto importante aki. Manera ta konosi e aña aki CCC ta selebrando su 70 aña di eksistensia dunando formashon musikal-kultural na nos komunidat”, señor Henny Cornelia a relatá. “No ta un proyekto fásil, ya komo ku promé ku a kuminsa ku e produkshon mester a laga digitalisá i registrá kada parti di un ka’i orgel individual. Danki na Refineria Isla di Kòrsou nos logra skèn kada piesa di un Ka’i Orgel di moda ku por a laga registrá i standarisá esakinan den un dokumento. Refineria Isla ta fabriká i entregá e piesanan di metal nesesario.

“Nos detenidonan no ta mal hende, pero a tuma mal desishon. Un proyekto manera esaki lo duna nos detenidonan e oportunidat pa siña un fishi i alabes kontribuí na nos kultura”, asina nos Minister di Hustisia señor Quincy Girigorie a èkspresá su mes, i ku esaki a duna inisio na e proyekto.

******

 

Foto 1: Akto di firmamentu di e dokumentonan konserni dor di señores Urny Floran (Direktor SDKK) i señor Henni Cornelia (Presidente di CCC).

 

Foto 2: Momentu ku ta presentá e promé modelo di e proyekto di Ka’i Orgel miniatura na tur e presentenan. Di robes pa drechi: señor Urny Floran (Direktor SDKK), señor Quincy Girigorie (minister di Hustisia), señor Henni Cornelia (Presidente di CCC) i señora Desiree Lai-Promes (Sekretario General di Ministerio di Hustisia).

 

Foto 3: Di robes pa drechi: señor Urny Floran (Direktor SDKK), señora Marilyn Alcalá-Wallé (Minister di Enseñansa, Siensia, Kultura i Deporte), señor Romeo Rudolph (Representante di CCC) i  señora Ruthsela Girigorie (Representante di Kas di Kultura), señora Migali Pinedo (Representante di Museo di Ka’i Orgel) i señor Rogelio Chirino (Instruktor Práktiko di Ka’i Orgel CCC).

 

Foto 4: Algun representante di e instanshanan ku ta kontribui ku e proyekto di Ka’i Orgel. Refineria Isla di Korsou, Kas di Kultura, Museo di Ka’i Orgel, Fundashon Sentro Kultural di Korsou i Sentro di Detenshon i Korekshon di Korsou.