KAMINATA PA TRESE KONSIENTISASHON RIBA E MALESA DI DEPRESHON

KAMINATA PA TRESE KONSIENTISASHON RIBA E MALESA DI DEPRESHON

Willemstad – Djasabra 4 di mei ta bai tin un ‘fitness walkathon’ organisá pa Fig Tree Training Institute na Kòrsou pa trese konsientisashon riba e malesa di depreshon. E ‘fitness walkathon’ lo kuminsá 6or di atardi na Parke Maripampoen, ku un tremendo ruta ku ta pasa dor di Penstraat, Pietermaai, Punda te Brion Plein i bèk pa Parke Maripampoen.

Fig Tree Training Institute a wòrdu fundá dor di Caroline van Romondt. Sra van Romondt a studia na Seminario na Kanada i tin un Master den Konsehería Bíbliko. Despues di su estudio, Sra van Romondt a establesé su mes na su isla natal i ta trahando komo konsehero, konferensista i tambe ta duna charla i kurso riba e tópiko di konseheria aki na Kòrsou i den eksterior.

E meta di Fig Tree Training Institute ta pa proveé kurso, tayer i konferensia segun e nesesidat i asina desaroya mas konsehero i  coach ku e hèrmènt nesesario pa ehersé nan trabou na un manera efektivo.

Depreshon ta un malesa ku ta afektá tur gremio di nos sosiedat i ta mas komún ku nos ta pensa. Pero nos no ta tende, ni papia muchu di dje. Ainda depreshon, manera otro malesanan mental, ta un tabú. Hopi biaha esun ku ta sufri di depreshon ta sinti hopi berguensa i no ta durf papia ni ku esnan mas serka di dje te pa buska yudansa profeshonal. Fig Tree Training Institute ke trese un kambio den esaki. Depreshon ta un malesa, meskos ku diabetes ta un malesa. Tin diferente tipo di depreshon ku ta pidi diferente tipo di tratamentu. Tin depreshon ku por wòrdu tratá dor di un sikologo, i ku konsehería i coaching. E asina yamá depreshon kliniko mester wòrdu tratá dor di un dòkter (un sikiatra) ku lo preskribí remedi ku lo yuda e persona aliviá e sintomanan di depreshon i duna e persona chèns pa trata e raís i problematikanan ku ta kousa e depreshon na promé lugá. Nos konseheronan ta usa e perspektiva bibliko i ta kere ku e palabra di Dios ta renobá e mente i trese na kla mentiranan i negativismo ku e persona ta entretené den su mente i ku ta guia na depreshon.

Nos ta invitá bo pa djòin nos den e kaminata aki; e por ta komienso di  sanashon pa bo òf bo ser kerí i tambe bo ta yuda pa un bon kousa. E fondonan ku nos rekoudá lo bai pa trein mas konseheronan i asina yuda mas hende posibel.

E “Fitness Walkathon” ta djis un komienso di un serie di aktividat i konferensia ku nos tin planiá pa e aña aki. Keda pendiente!

Karchi na balor di fl 15 pa persona. Pa mas informashon, check nos wèpsait www.figtreetraining.org òf yama tel. 528-5090 òf 523-5555.

Fight Depression LOGO

 

Fig Tree Training Institute LOGO-page-001

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: