Karta di Parlamentario Curtley Obispo dirigí na Minister di Tráfiko, Transporte i Planifikashon Urbano señora Zita Jesus Leito MBA ku tópiko: : UO Domeinbeheer su tarea, ròl i responsabilidat pa ku atministrashon di tereno i otro derechonan domanial pa asina por kumpli ku artíkulo 92 di Areglo di Estado di Kòrsou i artíkulo 11 di e Lei “Domaniale Gronden”.

Minister di Tráfiko, Transporte i Planifikashon Urbano  

Señora Zita Jesus Leito MBA

Seru di Arrarat, parsela C

 

Djabièrnè, 3 di mei 2019

 

Tópiko:  UO Domeinbeheer su tarea, ròl i responsabilidat pa ku atministrashon di tereno i otro derechonan domanial pa asina por kumpli ku artíkulo 92 di Areglo di Estado di Kòrsou i artíkulo 11 di e Lei “Domaniale Gronden”.

Apresiabel señora Minister Zita Jesus Leito,

Artíkulo 92 di Areglo di Estado di Kòrsou ta indiká ku segun lei ta regla atministrashon di “domaniale gronden” i otro derechonan domanial. Domaniale gronden ta trata tur ophetonan inmóbil kual ta inkluí terenonan di Pais Kòrsou. Artíkulo 11 insiso 2 di e Lei “Domaniale gronden” ta preskribí ku 1 biaha pa aña no mas tarda ku 31 mart, Minister di Tráfiko, Transporte i Planifikashon Urbano ta entrega na Parlamento di Kòrsou, un relato anual di e aña ku a pasa pa loke ta trata dunamentu di propiedat (“erfpacht”), e maneho i derechonan domanial. Di otro banda mester bisa ku Minister di Tráfiko, Transporte i Planifikashon Urbano ta dependé di UO Domeinbeheer pa tur aña por kumpli na tempu ku artíkulo 92 di Areglo di Estado di Kòrsou i  artíkulo 11 di e Lei Domaniale gronden.

Tambe mi mester indiká ku segun e sistema di informashon di RIS, Parlamento di Kòrsou, dia 31 mart 2015 a risibí di un Gobièrnu anterior e relato aki pa promé biaha. Un relato kual ku a raporta hopi lat i e relato no tabata pa aña manera e lei ariba menshoná ta preskribí. Refiriendo tambe na e último relato aki di 31 mart 2015, e tempu ei  a raportá pa e periodo 10 òktober 2010 te ku 31 desèmber 2014, e siguiente puntonan: (1) e kantidat di “beschikking” ku UO Domeinbeheer a duna, (2) e proyektonan realisá dor di UO Domeinbeheer pa desaroyá terenonan, (3) akshonnan realisá dor di UO Domeinbeheer pa kombatí okupashon ilegal, (4) fakturashon di erfpacht dor di UO Domeinbeheer pa asina por kobra erfpacht i (5) un resúmen detayá di e “beschikking”duna dor di UO Domeinbeheer .

Awe 3 mei 2019 mi tin ku konstatá ku pa añanan 2015, 2016, 2017 i 2018, no a raporta segun artíkulo 11 insiso 2 di e Lei Domaniale gronden. A base di e hecho akí, mi programa di kontrol parlamentario mi tin ku hasi preguntanan spesífiko i dirigí riba UO Domeinbeer su tarea, ròl i responsabilidat pa ku atministrashon di tereno i otro derechonan domanial pa asina por kumpli ku artíkulo 92 di Areglo di Estado di Kòrsou i artíkulo 11 di e Lei Domaniale gronden.

Hasiendo uso di mi derecho komo parlamentario pa hasi pregunta konforme artíkulo  96 di Reglamentu di órden di Parlamento di Kòrsou mi tin e siguiente preguntanan:

  1. Kua ta e problemanan spesífiko (“bottlenecks”) ku ta buta ku UO Domeinbeheer no por produsí e rapòrtnan nesesario pa asina Gobièrnu di Kòrsou tur aña, promé ku 1 aprel di kada aña, por raportá na tempu na Parlamento di Kòrsou?
  2. Kua ta e pasonan konkreto ku Minister di Tráfiko, Transporte i Planifikashon Urbano ta bai tuma pa asina UO domeinbeheer por produsí e reportahenan?. Pa asina Gobièrnu di Kòrsou den aña 2019 lo por raporta na Parlamento di Kòrsou, pa loke ta trata e añanan 2015 te ku 2018?
  3. Kua ta e pasonan konkreto ku Minister di Tráfiko, Transporte i Planifikashon Urbano ta bai tuma pa asina UO domeinbeheer por produsí e raportahe di aña 2019 na tempu?. Pa asina e aktual Gobièrnu di Kòrsou aki lo bira e promé Gobièrnu di Kòrsou kual ta raporta na tempu na Parlamento, promé ku 1 aprel 2020.

Atentamente,

Curtley Obispo

Parlamentario pa Kòrsou

PAR

Potret 2019 parlamentario Curtley Obispo vershon 2

This site uses Akismet to reduce spam. Learn how your comment data is processed.

error: Content is protected !!
%d bloggers like this: