TREMENDO APERTURA DI KAMPIONATO DI DAMA 2019! DURANTE WIKÈNT TRAS DI LOMBA NA TRENO DI WLLEMSTAD KU STADION DI SUBT!

TREMENDO APERTURA DI KAMPIONATO DI DAMA 2019!

DURANTE WIKÈNT TRAS DI LOMBA NA TRENO DI WLLEMSTAD

KU STADION DI SUBT!

Djabièrnè ku djasabra tras di lomba, e Kampionato di Dama 2019 a inisiá ku algun partido sumamente interesante. E apertura pa kategoria U-15 ku U-17 a tuma lugá dia 3 di mei den stadion di Willemstad pa mitar di 8 di anochi i dia 4 di mei pa mitar di 5 di atardi e ekiponan di senior a mira akshon.

Durante e partido inisial, e ekipo di Excellence School a enfrentá Inter Willemstad kategoria

U-15 miéntras den kategoria U-17 Hubentut Fortuna a enfrentá Jong Holland. Mas despues Jong Holland a topa Subt den kategoria U-15 i riba djasabra Vesta a topa Hubentut Fotuna senior den Stadion Dr. Antoine Maduro.

E anochinan a kuminsá ku palabra di Sr. Stanley Coffy, presidente di e komishon di Dama i despues e partidonan a kontinuá.

Durante e promé partido Excellence School a gana Inter Willemstad U-15 ku skor di 14 pa 0.  Despues Jong Holland a gana di Subt U-15 ku skor di 6-1 miéntras den U-17 Jong Holland ku Hubentut Fortuna a empata na 2 gol. Den kategoria senior Vesta ku Hubentut Fortuna tambe a empatá na 2 gol.

Kampionato di dama 2019 ta konta ku kategoria U-15, U-17 i senior.

Na tur tin un total di 14 ekipo repartí den e 3 kategorianan aki i nan ta lo siguiente;

Kategoria U-15:

1. Excellence School
2. Jong Holland
3. Inter Willemstad
4. Subt

 

Kategoria U-17:

1. Hubentut Fortuna
2. Excellence School
3. Vesta
4. Jong Holland
5. Subt

 

Kategoria Senior:

1. Hubentut Fortuna
2. Vesta
3. Inter Willemstad
4. Subt
5. Rio Magdalena

 

E ekipo nan aki lo bai enfrentá otro tur wikènt durante e partidonan di dama ku lo kontinuá próksimamente.

E komishon di dama ku a keda reorganisá resientemente ta trahando duru huntu ku e ekiponan di dama pa mira kon por promové futbòl di dama den nos pueblo. E meta di e komishon aki ta pa stimulá mas dama pa djòin un ekipo i kuminsá práktika futbòl. E aña aki, mes kos ku aña pasa, nos lo tin algun selekshon di dama ku lo bai representá nos den eksterior. E preparashonnan ya ta andando pa loke ta e proksimo kompromisonan internashonal. Pues trabounan ta sigui tuma lugá pa desaroyo di futbòl di dama aki na Kòrsou. Tur esaki, parti di un plan ku e komishon di dama a traha ku lo keda implimentá durante e aña nan binidero na bienestar di futbòl pa dama.

Pa abo dama ku ke práktika futbòl, bishitá nos página di Facebook; Curacao Woman Football òf Federashon Futbòl Kòrsou i haña tur informashon tokante e ekiponan di dama ku tin aktualmente.

Un invitashon ta bai na henter e pueblo di Kòrsou pa asistí na e diferente partidonan di Kampionato di dama 2019. Bin disfrutá di bo deporte prefrí i mira kiko tur nos dama nan tin aden!

Kòrda ku entrada pa e weganan di dama ta kompletamente grátis!