Karta di Parlamentario Curtley Obispo dirigí na Minister Presidènt i Minister di Asuntunan General, señor Eugene Rhuggenaath tokante: Status di Plataforma di Legislashon i evaluashon di AWOK.

Minister Presidènt di Kòrsou

Minister di Asuntunan General   

Señor Eugene Rhuggenaath MBA/MBI

Fort Amsterdam # 17

 

Djabièrnè, 10 mei 2019

Tópiko:  Status di Plataforma di Legislashon i evaluashon di AWOK.

Apresiabel señor Minister Presidènt Eugene Rhuggenaath,

Pa ami komo parlamentario ta importante ku Gobièrnu di Kòrsou sigui traha na un manera integral i ku tur 9 ministerio ta akoplá ku otro pa loke ta e aspekto di Legislashon. Legislashon ta fundamental pa sòru pa un desaroyo positivo di nos Pais Kòrsou. Den e kuadro aki sigur ta importante pa entre otro: (1) fortalesé e prosesonan pa ku legislashon inkluyendo regulashon (“regelgeving”), (2) stimulá koperashon kontinuo entre e diferente aktornan den henter e aparato gubernamental, (3) konsultanan di lei struktural plùs kompartí konosementu i eksperensia riba área di legislashon di Pais Kòrsou i (4) inventarisashon interministerial di kua leinan tin ku wòrdu traha, aktualisá òf tradusí den maneho.

Riba rekomendashon di señor Minister Presidènt Eugene Rhuggenaath mes, Konseho di Minister di Gobièrnu di Kòrsou a aprobá un instalashon di un Plataforma di Legalisashon (“Platform Wetgeving”). E Plataforma di Legalisashon a wòrdu formalisá dor di Gobièrnu di Kòrsou via e dekreto nashonal di 16 novèmber 2018 no. 18/3168. Un Plataforma di Legalisashon ku 4 tarea i ku e meta pa stimulá kalidat/konosementu di legislashon di Pais Kòrsou.  Sigur un bon desishon, kual ta mustra tambe vishon den kuadro di e 4 puntonan ariba menshoná. Ta huntu ta mehora kalidat di legislashon i mas bon konosementu di legislashon di Pais Kòrsou. Un bon desishon ku ami komo parlamentario ta aploudí i tambe sostené den kuadro di revishon/modernisashon di Legislashon di Pais Kòrsou. Direktorado Legislashon i Asuntunan Hurídiko di Ministerio di Asuntunan General tin un ròl di liderazgo pa ku e proseso legislativo di Pais Kòrsou i tambe ehekushon di e Plataforma di Legislashon.  Un ròl di liderazgo ku e metanan di supervisá i promové un kalidat haltu di legislashon i regulashonnan.

A base di dekreto nashonal di 16 novèmber 2018 no. 18/3168, mi programa di kontrol parlamentario i hasiendo uso di mi derecho komo parlamentario pa hasi pregunta konforme artíkulo 96 di Reglamentu di órden  di Parlamento di Kòrsou mi tin e siguiente preguntanan:

Dekreto nashonal di 16 novèmber 2018 no. 18/3168 (Platform Wetgeving”):

  1. Kua ta status di ehekushon di kada un di e 4 tareanan manera menshoná den artíkulo 2?
  2. Kua ta e status di ehekushon pa loke ta artíkulo 3 (reunionnan di e Plataforma di Legislashon)?
  3. Kua ta e status di ehekushon pa loke ta artíkulo 4 (reunionnan di e “Ketenoverleg wetgeving”)?

Huristanan di Lei

  1. Un otro aspekto super importante banda di e Plataforma di Legislashon, segun mi ta pa sòru pa strukturalmente tin mas huristanan di lei (“wetgevingsjuristen”) den tur e 9 ministerionan di Gobièrnu di Kòrsou. Pregunta: tin plannan konkreto di Gobièrnu di Kòrsou pa yega na un estudio Karibense di Hurista di Lei (“deeltijd lokale opleiding wetgevingsjuristen”)?.

Onderlinge regeling Ambtelijk Wetgevingsoverleg Koninkrijksrelaties [AWOK]

(P.B. 2013, no. 9)

  1. A tuma lugá kaba segun artíkulo 8, e promé evaluashon konhunto dor di Paisnan Kòrsou, Hulanda, Aruba i Sint Maarten di e AWOK? Si ta e kaso, petishon pa risibí e evaluashon aki.

 

Atentamente,

Curtley Obispo

Parlamentario pa Kòrsou

PAR

Potret 2019 parlamentario Curtley Obispo vershon 2

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: