Prome Minister Evelyn Wever-Croes:BIAHE CORTICO PERO CU IMPORTANCIA GRANDI PA NOS PAIS

Prome Minister Evelyn Wever-Croes:

BIAHE CORTICO PERO CU IMPORTANCIA GRANDI PA NOS PAIS

Enfoke di e prome reunionnan tawata riba e impacto di e crisis migratorio di Venezuela riba nos islanan

Prome Minister Evelyn Wever-Croes ta na Washington Merca riba un biahe cortico di trabou di dos dia pa un mision conhunto cu Embahador di Reino na Washington, sr. Schuwer y Prome Minister di Corsou Eugene Rhuggenaath. E biahe di trabou aki enberdad ta cortico pero cu un importancia hopi grandi tanto pa Aruba como pa nos isla ruman Corsou. E prome dia di reunionan tawata tenso pero, Prome Minister ta duna di conoce cu nan tawata bon reunionnan cu tawata enfoca mas tanto riba e tema di crisis migratorio na Venezuela y su impacto riba Aruba y Corsou.

A reuni cu representante di USA International Development Agency (USAID), señora Bonnie Glick kende ta encarga cu aspectonan humanitario na Venezuela. Prome Minister a duna un splicacion cu e crisis di Venezuela tin un impacto hopi grandi pa Aruba. A yega na palabracionnan cu lo explora e manera con e agencia aki por yuda nos na Aruba mes pa alivia e situacion aki.  

Tambe a reuni cu sr. Elliott Abrams, kende ta e representante special di Venezuela na State Department. E reunion aki a enfoca tambe riba e impacto cu e situacion na Venezuela tin riba nos pais y e ultimo desaroyonan.

Despues di e reunion cu sr. Elliott Abrams a sigui e reunion cu Under Secretary sr. David Hale di State Department. Sr. Hale ta un persona di rango hopi halto pa loke ta trata e tema di Venezuela. Un reunion a bay hopi bon na unda di banda di State Department, nan ta reconoce cu nos paisnan, ta esunnan cu relativamente ta wordo mas afecta cu e situacion di Venezuela. Nan a duna nan palabra cu nan lo brinda nos nan yudansa pa atende cu esaki. E punto aki ainda mester wordo concretisa mas.

Siguientemente, a reuni cu sr. Luis Almagro kende ta Secretario General di Organization of American States (OAS). OAS ta hunga un papel hopi importante den logra pas na Venezuela. E conbersacionnan hiba den e reunion aki ta concentra riba nan esfuerso den esaki y riba kico mas nos por spera.

Finalmente, a reuni cu Deputy National Security Advisor na Cas Blanco pa asina haya mas informacion di e situacion pa loke ta trata e aspectonan di siguridad di nos paisnan. Aki tambe tawata tin comprension pa e posicion di e islanan. Aruba ta gosa di un cooperacion hopi estrecho y cu semper a traha hopi bon cu National Security Advisor. Den esaki, nan a realisa tambe cu ta momento cu nan sali y saca man y yuda.

“Central den tur e reunionnan tawata e impacto cu tanto e crisis di Venezuela como e impacto cu e decisionnan di Merca tin riba nos islanan Aruba y Corsou. E Siguiente reunionnan lo enfoca riba e refineria, e sanccionnan y desaroyo economico di nos islanan. Den e reunionnan tocante refineria, lo asisti e delegacionnan di e refinerianan di Corsou, Curoil y refineria di Aruba”, Prome Minister Evelyn Wever-Croes a duna di conoce.