Komo parti di Strategia di kresementu pa Kòrsou Trabounan pa realisashon di Parke di Mangrove I ta bai kuminsá.

Komo parti di Strategia di kresementu pa Kòrsou
Trabounan pa realisashon di Parke di Mangrove I ta bai kuminsá.

Willemstad – Ku firmamentu di akuerdo entre Gobièrnu di Kòrsou i e kompania “Heuverman Ibis” ta dal un paso konkreto pa kombertí e área di mangove na Ref den un goya di un parke. E akuerdo a keda firmá, den presensha di Minister di Tráfiko, Transporte i Planifikashon Urbano, señora Zita Jesus-Leito, dor di, direktor di sektor di infrastruktura i planifikashon urbano, señora Manuel i representantenan di Domeinbeheer. Na aña 2016 e kompania “Heuvelman Ibis” a gana e destaho públiko pa hasi e trabounan di saniamentu di e Parke di Mangrove I i pa despues sigui ku e transformashon di e parke aki. Kreashon di e Parke di Mangrove I ta un di e proyektonan realisá den kuadro di Programa pa Desaroyo di Ref ku ta forma parti di e Strategia di Kresementu pa Kòrsou.

“Kòrsou tin un sentro di siudat ku un balor kultural históriko enorme i e área di Ref ta forma parti di nos sentro di siudat. Den kuadro di kreashon di e Ref di futuro, mester krea un área ku ta sano i saludabel pa komunidat di Kòrsou i tambe esnan ku ta bishita nos pais por disfrutá di dje. E parke di Mangrove lo keda kombertí den un parke ekológiko ku tantu lokalnan komo turistanan por hasi uso di dje, sea pa kana libremente òf pa nabegá den dje ku kano.” Minister Jesus-Leito a bisa.

Aktualmente e parke di Mangrove ku ta keda entre e parti nort di e terminal di krusero di CPA, na parti sùit di tereno Courtyard Marriot, wèst di pisina Benie Leito i ost di Stadion di Ref – konosí komo Mangrovepark I – ta hopi sushi i kontaminá. Lo limpia e área aki dor di hasi e trabounan di saniamentu nesesario pa despues por transformá esaki den un parke di Mangrove. Di e forma aki lo eliminá e problema di sangura ku ta eksistí i e holó desagradabel.

E trabounan ta partí den dos fase. E promé fase lo ta e parti di saniamentu di e Parke di Mangrove ku e trabounan di draga (bagger) korespondiente. E fase aki ta dura seis (6) luna i ta planea pa kuminsa mei mei di yüni 2019. E di dos fase, ta sigui mesora despues. Den e fase aki ta pone instalashonnan nesesario pa krea e rutanan den e parke kaminda e kano nan por nabegá i krea kaminda hende por kana. E fase aki tambe tin un durashon di seis (6) luna.

Minister Jesus-Leito a bisa ku ta di suma importansia ku durante tipo di proyektonan grandi asin’aki, nos hóbennan tambe ta haña oportunidat pa trabou. Pa e motibunan aki ya kaba a hasi kontakto ku instansianan konserní pa asina sigurá partisipashon laboral di komunidat di Kòrsou.

E proyekto aki ta un bon ehèmpel pa mustra kon di un forma determiná Minister Jesus-Leito huntu ku ministerio di Tráfiko, Transporte i Planifikashon Urbano ta traha na desaroyo balansa i duradero entre naturalesa i ekonomia.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: