Prome Minister Evelyn Wever-Croes: Prome Minister y famia ta desea e pueblo di Aruba un:FELIZ DIA DI FAMIA“Cada famia ta un ekipo cu por enfrenta e retonan cu cada famia ta encontra”

Prome Minister Evelyn Wever-Croes:

Prome Minister y famia ta desea e pueblo di Aruba un:

FELIZ DIA DI FAMIA

“Cada famia ta un ekipo cu por enfrenta e retonan cu cada famia ta encontra”

Mundo awe ta celebra Dia di Famia. Ora cu nos ta papia di famia, di biaha nos ta ilustra den nos mente un tata, un mama, yiunan, welo y wela, omo y tantanan, nietonan. Nos ta pensa riba recuerdonan di momentonan comparti, riba fiestanan, comemento hunto tur diadomingo, biahenan hunto ta hasta riba e momentonan difisil cu cada famia ta enfrenta.

E famia ta e prome pilar di tur sociedad, e luga na unda nos ta crece y wordo forma como homber y muhenan. E famia ta e prome instituto na unda nos ta wordo educa y nos ta siña e balor y principionan moral. E famia ta e prome union na unda nos ta siña stima otro y ta forma lasonan mas profundo. E famia ta e prome ambiente na unda un mucha ta experimenta amor y ta crece cu confiansa y siguridad den un mundo demasiado agita. E famia ta e espacio unda cu e vocacion di sirbi otro, solidaridad cu otro, responsabilidad un cu otro, tolerancia, honestidad, respet y tur norma y balornan ta wordo funda y inculca. E famia ta e laso na unda cada un persona ta central.

Desde comienso di gobernacion, Gabinete Wever-Croes a dicidi di pone e ser humano central den e gobernacion aki pa asina cambia e enfoke di e desicionnan di Gobierno y pone mas enfasis riba cada persona cu ta biba riba nos isla. Prome Minister Evelyn Wever-Croes, cu esaki den mente, a declara aña 2019 como Aña di Famia y Cuido di nos Muchanan.

Riba Dia Internacional di Famia, laga nos tur brasa nos famia y haci promesanan di nobo cu nos lo cuida di otro. Como famia nos tur mester tin e meta pa e fundeshi familiar y e balornan universal engrandece y alabes haci e base entre famianan, amistadnan y colegialidad bira mas fuerte. Cada famia ta un ekipo cu por enfrenta e retonan cu cada famia ta encontra. Un fundeshi solido di un famia solido por yuda nos generacionnan bira exitoso den bida.

Prome Minister Evelyn Wever-Croes y famia ta desea e pueblo di Aruba un Feliz Dia di Famia.