Wes ta duna kastigu severo den kaso di eksplotamento di ATM Corrieweg (Girobank)
Wes ta duna kastigu severo den kaso di eksplotamento di ATM Corrieweg (Girobank)
Djarason merdia 15 di mei tabatin un kaso den korte kontra di e sospechosonan R.B. (21 aña), J.X.F.J. (27 aña), F.W.B (37 aña) en C.D.P. (37 aña). Dia 11 di yanüari 2019 konhuntamente nan a trata di eksplotá un ATM, lokual a wòrdu evitá dor di e banko den koperashon ku polis. Durante di nan huída, e dos sospechosonan mas grandi a dal nan outo den esun di polis i pa por a detené nan mester a tira dirigí riba nan. Tur dos sospechoso ta rekuperando di herida di bala ku nan a risibi. Tur 4 sospechoso a rekonosé nan parti den e echo kastigabel. Tambe nan a pèrde trabou pa motibu ku nan ta será den SDKK.
Fiskal a pidi kastigu haltu pa motibu ku tin hopi kaso di eksplotashon di ATM na Kòrsou ultimamente. Den 2018 tabata 4 i te na e momentu nan aki den 2019 ya kaba tabatin 6. E eksplotashon di ATM aki tabata èkstra peligroso pa motibu ku tabatin hende drumi den e apartamentunan riba e ATM. Nan a keda akusá pa intento di robo, pero tambe pa okashoná un eksploshon ku peliger pa material i hende. Wes a dikta un veredikto severo pa mustra bon kla pa otronan no skohe e kaminda pa bai eksplotá ATM (prevenshon general). E sospechosonan di mas grandi a haña un kastigu di prison di 36 luna di kua 6 luna kondishonal ku un periodo di prueba di 3 aña. E dos sospechosonan mas yöng (trahadó di e dos otronan) a haña un kastigu di prizon di 30 luna di kual 15 luna kondishonal i un periodo di prueba di 3 ana. Tres di e kuater sospechosonan a wòrdu imponé supervishon di reclassering.
Si bo eksplotá un ATM i bo wòrdu gará, bo ta haña un kastigu haltu. Si bo logra kwe plaka pero despues bo wordu detené dor di polis i OM, lo bini por lo menos un terser parti èkstra riba bo kastigu. OM ta premirá mas detenshon riba termino korto den otro kasonan di ATM ku a wordu eksplotá.