KOSECHA: DI MEI 1969 PA MEI 2019Instituto Alsa Papiamentu ke invitá un i tur pa bin selebrá su aniversario i tendeeksperiensia di esnan ku tabata hóben durante 30 di mei 1969

KOSECHA: DI MEI 1969 PA MEI 2019
Instituto Alsa Papiamentu ke invitá un i tur pa bin selebrá su aniversario i tende
eksperiensia di esnan ku tabata hóben durante 30 di mei 1969

E aña akí, konmemorashon di 30 di mei lo ta 50 aña después di e fecha históriko i tambe e di 12 aña
ku Instituto Alsa Papiamentu ta dediká na un tema tokante desaroyo di Papiamentu den komunidat. E
konmemorashon di e aña akí ta dediká na eskritornan di e tempu akí, esta kon i kiko nan a eksperenshá
pa loke ta e fecha aki.
For di 1994 Gobièrnu di Kòrsou a disidí ku ta nesesario pa 30 di mei ta un Dia di Konmemorashon. Tin
diferente opinion tokante kiko tabata e kousanan di 30 di mei 1969 i kiko ta e konsekuensianan. Opinion
general ta ku e susesonan ku a tuma lugá na 1969 ta un di esnan mas violento ku Kòrsou a konosé
despues di e periodo di sklabitut.
Pero 30 di mei tabatin un banda positivo pa kultura i identidat di pueblo di Kòrsou. Ta konosí ku
Papiamentu a hunga un ròl desisivo durante e proseso pa yega na 30 di mei (Vitó). Durante e dia mes,
esta 30 di mei 1969, Papiamentu tabata e idioma di identifikashon di partisipantenan den e movementu.
Djis despues na 1975 e tabata un di e motibunan pa e lucha sindikal di maestronan di skol di mas largu
di historia (21 dia). P’esei Instituto Alsa Papiamentu, un fundashon di dosente i amigunan di
Papiamentu, a skohe e dia akí pa konmemorá su eksistensia.
Ta konosí ku hóbennan di e tempu ei tabatin un papel desisivo den e diskushonnan ku a hiba nos na
30 di mei i tin hóben ku a resultá heridá den e marcha pa bai Fòrti. Otro hóben su mayornan a partisipá
den e lucha, miéntras tin ku mester a skonde ku nan mayornan pa miedu di represaya.
Dia 30 di mei próksimo, dos adulto mayó lo trese nan historia i papia di nan eksperiensia durante e
susesonan ku nan a pasa aden dia 30 di mei 1969. Un di nan tabata un hóben den kuerpo di polis na
Kòrsou (Fred Wiel) i e otro tabata un studiante na Hulanda (Charles Do Rego). Dos diferente
perspektiva, na dos diferente lugá pero tur dos ku bista pa un mihó porvenir. Nos lo tin ademas un
programa kultural ku baile di e hóbennan Atala Crispulo i Mis-Leemy & Co i lo no falta nos
banderitanan riba e dia aki. Ku e aktividat akí Instituto Alsa Papiamentu ta spera di por yega huntu
ku otro organisashonnan na un interpretashon mas balansá i un bista mas positivo di e susesonan ku
a tuma lugá durante e dia históriko akí.

Fecha: 30 di mei 2019
Ora: 7.30 – 10.00, Entrada ta grátis
Lugá: Biblioteka Nashonal Kòrsou, Frank Martinus Arion
Pa entrevista i mas informashon: Tel: 7673433 / 5122020 / email: instituto@alsapapiamentu.org


 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: