Aruba, Curaçao, Ulanda i Sint Maarten ta intensivá koperashon di trabou pa mihó kuido  den salubridat den Reinado p’e parti di Karibe

Aruba, Curaçao, Ulanda i Sint Maarten ta intensivá koperashon di trabou pa mihó kuido  den salubridat den Reinado p’e parti di Karibe

 

Willemstad, E kuater mandatarionan di salú di Reino, a reuní na Boneiru pa e di tres reunion di maneho (Bestuurlijk Overleg) pa drecha kalidat den kuido i tambe pa sigui profeshonalisá esaki. Minister Oduber (Aruba), Minister Camelia-Römer (Curaçao), Sekretario di Estado Blokhuis (Ulanda) i Minister Lee (Sint Maarten) a deklará di lo intensivá nan kolaborashon huntu.

Gruponan di trabou a bini huntu pa prepará e akuerdonan tokante entre otro, programa di prevenshon, kolaborashon entre hospitalnan, remedi, edukashon di profeshonalnan den kuido i interkambio di informashon.

Mas kolaborashon entre hospitalnan

Partikularmente ora ta ofresé kuido speshalisá den hospital, e paísnan ke forma un bloke mas firme di e koperashon. Esaki ta pa duna kuido na nos hendenan mas tantu posibel den Reinado mes i evitá ku tin ku manda hende den eksterior. Esaki ta nifiká  ku mester hasi eskoho di ekspertisio pa kada hospital.

Ehersisionan pa krísis.

Pa ta mihó prepará den situashonnan di krísis manera den kaso di orkan Irma, e kuater paísnan a lanta un grupo di trabou pa asina apoyá e organisashon di asistensha médiko, pa viktimánan por haña kuido médiko optimal i di bon kalidat, sin ku e kuido pa pashèntnan i gruponan vulnerabel ta kore riesgo i pa tin remedinan den stὸk. A traha un manual di krìsis. Resien a hasi un ehersisio ku evakuashon di pashènt. E ehersisio tabata eksitoso i a duna basta puntonan di mehoransa, por ehèmpel riba tereno di komunikashon ku otro. Ku esaki a krea un base solidó pa bon koperashon. Bou di direkshon di Sint Maarten e puntonan di akshon lo keda desaroyá i introdusí. Ta bai inkluí Kòrsou, Aruba i Boneiru tambe den e manual.

Atenshon pa prevenshon i kambio di estilo di bida.

Prevenshon i estilo di bida no tabata riba e agenda konhunto di e kuater paísnan. A palabrá ku e topiko aki lo bin prominentemente riba e agenda pa e proksimó reunion di

 

maneho (Bestuurlijk Overleg). Mas aleu Aruba i Ulanda ta sondeá e posibilidat pa haña mas koperashon riba tereno di kuido hubenil, kuido soshal emoshonal, kuido pa adikshon, abusu di mucha i kuido pa hendenan ku un deshabilidat. Pa Boneiru i Sint Eustatius, Ulanda a firma un akuerdo di prevenshon i deporte, den kual a palabrá akshonnan konkreto pa un Karibe Ulandes (BES) mas salú. Tambe tin hopi atenshon pa mas moveshon pa grandi i chikí. Mehorashon di e salú seksual tambe ta un parti importante.

Kòrsou ta trahando na duna mas atenshon na “hechtingsproblematiek” serka mamanan hóben.

Mas profeshonal di kuido na trabou.

E kuater paísnan ta traha huntu na un kuadro di kalidat pa por atmití profeshonalnan médiko. Esaki lo trese kuné ku por ehèmpel mas hende por traha mas fásil entre e diferente paisnan. Pero tin tambe diferenshanan spesífiko riba e merkado laboral den kada país. P’esei tin diferente akshon ku ademas kada pais ta tuma pa keda profeshonalisá. Asina Aruba ta traha na rekonosementu i registrashon di diplomanan ku a keda adherí den eksterior. Tambe Aruba ta traha na un instituto di kalidat ku lo evaluá  speshalistanan estranhero. Sint Maarten ta traha na un proposishon pa haña mas apoyo di CIBG (Ulanda) ora ta evaluá esnan ku a haña un diploma den eksterior. Kὸrsou ta den kombersashon ku “Universitair Medisch Centrum Groningen” di manera ku e dὸkternan ku diploma básiko por sigui nan edukashon pa speshalista na Groningen.

Kontinuashon

Na 2020 e reunion ta keda organisá na Sint Maarten.