Diskushon públiko entre Refineria Isla i Refineria di Kòrsou no ta kumbiní Kòrsou.

Diskushon públiko entre Refineria Isla i Refineria di Kòrsou no ta kumbiní Kòrsou.

 

Frakshon di MAN a tuma nota den prensa di un diskushon rondó di Refineria Isla (PDVSA) i Refineria di Kòrsou (RDK). Nos a komprondé ku Refineria Isla lo no sigui koperá pa duna RDK informashon. Konsiderando e situashon aktual den kual ta buskando un partner nobo pa operá nos Refineria ta di sumo importansia un bon koperashon entre Refineria Isla i Refineria di Kòrsou pa e proseso por kana bon mirando e tempu korto ku a sobra.

Frakshon di MAN ta di opinion ku Gobièrnu di Kòrsou mester asumí e responsabilidat i e ròl pa intermediá pa pone partidonan na mesa pa atendé e asuntu aki i no den prensa manera e ta sosodiendo awor aki.

Den kuadro di esaki Parlamentario pa frakshon di MAN sra Giselle Mc William a hasi Minister di Asuntunan General e siguiente preguntanan:

 

  1. Sr Minister a tuma nota di e situashon rondó di Refineria Isla I Refineria Kòrsou den prensa?
  2. E echo ku Refineria Isla no ke suministrá informashon na Refineria Kòrsou, ki konsekuensia esaki por tin pa e proseso ku tin andando pa yega na partner pa operá nos Refineria?
  3. Gobièrnu tin un plan pa sa kon lo bai atendé ku e situashon aki?
  4. Refineria Isla por ninga akseso/entrada na Refineria di Korsou?

 

Moshon

Dia 22 di ougùstùs 2013 Parlamento a pasa un moshon unánimemente durante di un reunion públiko den Parlamento di Kòrsou den kual ta disidí pa Gobièrnu di Kòrsou mantené Parlamento riba un base regular (p.e. kada 3 luna) informá riba progreso di e deliberashonnan/avansenan.   Basa riba e moshon aki nos lo ke urgi Minister pa bini parlamento pa asina duna un splikashon kon leu e proseso ta pa yega na un partner pa operá nos Refineria.

This site uses Akismet to reduce spam. Learn how your comment data is processed.

%d bloggers like this: