MINISTER LAMPE E PROYECTO VISION ECONOMIA CIRCULAR 2050 (VEC)
Minister Armando Rudy Lampe:
Durante di e 49 Conferencia International di Acuril:
MINISTER LAMPE E PROYECTO VISION ECONOMIA CIRCULAR 2050 (VEC)
Durante di e 49 Conferencia International di Acuril, Minister di Enseñansa , Ciencia y Desaroyo Sostenibel, Minister Rudy Lampe a presenta pa di prome biaha e proyecto Vision Economia Circular 2050 (VEC). Despues di a introduci Plan Educacion National 2030 (PEN) minister Rudy Lampe ta pionero cu un plan cu por salvaguardia nos futuro existencia.
Tur proceso tin su debido tempo cu nan por wordo introduci y implementa, y Minister a admiti cu e ta sembrando e simia, pero e no lo wak e mata, dus vooral den sector di Educacion esaki ta mas cu logico mirando cu cambio drastico no sa pasa diripente.
Desaroyo no semper ta bay man den man cu crecemento economico tampoco, pasobra nos ta destrui e unico planeta cu nos tin. Pero desaroyo sostenibel a base di un Economia Circular ta basa riba uzo y re-uzo di nos recursonal ambiental pero riba un manera cu no ta causa un impacto negativo riba nos planeta y nos existencia.
Economia Circular ta gosa di hopi sosten internationalmente y ta wordo mira como e proximo revolution industrial. E ta un sistema economico completamente diferente di esun actual, cu ta uno di tuma, traha y tira afo. E mision ta pa e ser humano por biba riba madre tera sin tin impacto desastroso riba medio ambiente.
Basa riba estudio di e escolar Arubano Kevin de Cuba, cu ta un di e lidernan internacional riba e tema di economia circular, e vision ta pa enfoca riba un economia circular sostenibel. Pasobra nos por uza y re-uza materialnan cu no ta sostenibel tambe, y esey no ta berdaderamente sostenibel pasobra asina nos ta gasta nos recursonan y medio ambiente. Dus mester scoge pa materialnan mas sostenibel den tur nos procesonan di produccion.
“Economia Circular ta basa riba e continuacion di e ser humano y su abilidad pa biba den harmonia cu naturalesa y salvaguardia medio ambiente pa futuro generacionnan”, Minister Lampe a conclui expresando den e di 49 Conferencia International di Acuril”.
