Instituto pa Formashon Musikal  FESTIVAL UN KANTO PA KORSOU 2019 TA BAI BIRA MAS GRANDI KU NUNKA

Instituto pa Formashon Musikal

 FESTIVAL UN KANTO PA KORSOU 2019 TA BAI BIRA MAS GRANDI KU NUNKA

WILLEMSTAD – Nos ta na rekta final ku e preparashonnan pa Un Kanto pa Kòrsou 2019 ku lo tuma lugá djasabra awor 8 di yüni na Brakkeput Mei Mei.

E festival aki a karakterisá su mes komo un Festival grandi na kontenido, den kual nos tin areglo moderno i  komposishonnan ku kontenido profundo, ku ta ilustrá e grandesa di Kòrsou.

Nos pais por ta pasando momentunan difísil, pero e Festival aki hustamente lo sirbi komo un medio pa alimentá nos pueblo ku Kòrsou ta grandi i ku e posibilidatnan pa mehorashon tei presente.

E komishon organisadó ta sumamente satisfecho pa e forma serio ku e músikonan ku ta forma parti di orkesta i demas partisipantenan a demostrá durante tur e ensayonan.

Festival Un Kanto pa Kòrsou a demostrá un biaha ku ta profeshonalismo ta kontra. E orkesta durante un seshon di tres ensayo pa kada komposishon, a demostrá ku nan por dominá e parti musikal i ku  tin tur indikashon ku esnan ku lo ta presentá djasabra awor lo por disfrutá di un tremendo bankete musikal.

Ta bon pa menshoná aki ku e Festival di e aña aki, tur partisipante lo presentá unu tras di otro den un solo presentashon i despues di esaki hurado lo retirá pa duna nan veredikto.

E parti di Show Time ta tuma lugá despues di e último presentashon i durante di e espasio di Show Time ku ta sigui, e públiko presente lo por disfrutá di un show kaminda Juni Juliet lo bai toka mandolin den un di e piesanan ku e ta presentá i ademas di esei, e lo kanta un di su promé komposishonnan.

Despues di e parti di homenahe na su persona, na e mesun momentu maestro di seremonia lo anunsiá e 7 komposishonnan ku a skor mas haltu i seguidamente lo saka e finalistanan i komposishon ganador. Zonido pa e anochi aki ta na enkargo di Hitz

For di  7.00 pm públiko por drenta e lokalidat pa tuma asiento i pa 7.30 pm en punto e Festival lo kuminsá.

Ta bon pa rekordá tur esnan ku ta puntra ku Beep Beep tambe tin karchi a rason di 25 florin i si sobrá e karchinan na porta lo kosta 35 florin.

Ban gosa Festival Un Kanto pa Kòrsou 2019 dediká na Juni Juliet

Atentamente

This site uses Akismet to reduce spam. Learn how your comment data is processed.

%d bloggers like this: