Premier Evelyn Wever-Croes: CUMPRE DI PREMIERNAN DI ARUBA, CORSOU Y SINT MAARTEN NA CORSOU “Si nos haci cosnan hunto, nos ta mas fuerte para pa enfrentra tur e retonan”

June 17, 2019 REDAKSHON

Premier Evelyn Wever-Croes:

CUMPRE DI PREMIERNAN DI ARUBA, CORSOU Y SINT MAARTEN NA CORSOU

“Si nos haci cosnan hunto, nos ta mas fuerte para pa enfrentra tur e retonan”

Dialuna 17 di juni ta tuma luga na Corsou e siguiente reunion entre e tres Prome Ministernan di Aruba, Corsou y Sint Maarten. E cumbre di e tres Premiernan a cuminsa desde aña pasa ora cu Premier Evelyn Wever-Croes, Premier Eugene Rhuggenaath y Premier Leona Marlin a drenta recien den Gobierno di nan respectivo pais. Ya tawata tin varios reunion na tur tres pais.

Den e cumbre di Corsou, lo tin 11 punto di agenda cu lo wordo discuti, entre otro e tema di Venezuela y con hunto e tres islanan por para riba e mesun linea pa atende cu e impacto di e crisis migratorio di Venezuela tin riba nos islanan. Ta conoci pa tur hende cu e impacto di e problema aki ta hopi grandi y cu ta tuma hopi tempo di e gobernantenan. Pa cua motibo, Premier Evelyn Wever-Croes ta bisa cu ta hopi importante pa ta para riba e mesun linea pa fortalece otro den tur e retonan cu e islanan ta enfentando.

E tema di integridad ta un tema cu lo sigui haya atencion den e cumbre di tres Premiernan. Pa Gobierno di Aruba esaki ta un tema hopi importante. Gabinete Wever-Croes tin un agenda hopi ambisioso riba e tereno di integridad. Y ta hopi importante pa Aruba, Corsou y Sint Maarten cana hunto tambe y yuda otro caminda cu por y tin mester. E expertonan cu ta trahando y ta dispuesto pa traha riba e tereno aki no ta hopi riba e islanan. Aruba na e momentonan actual tin un problema pa haya un hefe di e departamento nobo Bureau Integridad cu ta tardando Aruba pa ehecuta e plannan mas lihe.

“Ta importante pa crea un grupo cu expertonan di Aruba, Corsou y Sint Maarten pa hunto comparti trabounan sperando cu esaki lo alivia e tareanan”.

Un punto cu e biaha aki lo ta pa prome biaha riba agenda den e Cumbre di e Premiernan ta eGovernment. Despues di e biahe di Estonia, Premier Wever-Croes a comparti cu su homologonan di Corsou y Sint Maarten, e vision y experencianan di e cooperacion cu Aruba tin cu Estonia. Sint Maarten ya caba tambe ta trahando cu Estonia riba eGovernment. Corsou ta den e proseso pa inventarisa den ki direccion e kier bay.

“Si nos haci cosnan hunto, nos ta mas fuerte para pa enfrentra tur e retonan. Despues cu e reunionnan tuma luga, lo mi duna un relato mas amplio tocante tur e puntonan cu a wordo trata den e reunion di e 3 Premiernan cu lo tuma luga na Corsou dialuna”, Premier Evelyn Wever-Croes a enfatisa.