FFK KU ATENSHON PA E AKTONAN DI VIOLENSIA KU TA TUMANDO LUGÁ!

FFK KU ATENSHON PA E AKTONAN DI VIOLENSIA KU TA TUMANDO LUGÁ!

 Den kuadro di e violensia ku a lanta kabes den nos komunikdat di kual deporte no ta un esepshon, direktiva di FFK, klupnan, rèfrinan, kuerpo di seguridat i e kuerpo médiko a bini huntu pa trata konhuntamente kon pa frena i yega na solushonnan pa kaba ku e ola di violensia ku tambe ta tumando lugá durante partidonan di futbòl ultimamente. Djasabra, 15 di yüni, den sala Richard Th. Curiel na FFK un grupo di alrededor di 50 hende a bini huntu pa debatí riba e problematika aki. E mainta a kana hopi bon i tur por a duna un grantito di nan banda pa kontra aresta esaki. Nos a yega na e palabrashon ku nos ta bai bolbe praktika 0 toleransia durante partidonan di futbòl. Esaki ta nifiká ku e seguridat durante e partidonan di U-17 te ku senior ta bai bira mas severo i lo no tolerá mal komportashon di niun fanátiko. Despues ku un fanátiko haña un atvertensia serka un miembro di seguridat, si nan sigui aktua lo tuma medida i saka nan for di stadion. Durante weganan hubenil e klup di kas lo ta responsabel pa tur kos kana na òrdu ora di wega. Futbòl hubenil tei pa desaroyo di nos hóben nan i ta p’esei e entrenadónan tin un tarea importante komo edukadó di nan hungadónan. Pa logra esaki nan mes mester ta bon prepará i mester tin diplomanan adekuá manera D-License, ku ta un kurso ku FFK ta brinda pa entrenadónan. Tambe e hungadónan mester ta na altura di reglanan di futbòl i mester respetá nos arbitronan. Kada klup ta responsabel pa nan hungadónan ku nan fanatikada.

Aparte di eseinan nos lo sigui ku promoshon kontra violensia, nos lo pone bòrchi den e stadionnan, lo repartí pamflèt den stadion ora di wega i rèfrinan lo sigui ku nan kampaña kontra violensia. Den futuro nos lo sigui pensa sistemanan nobo i modèrno pa keda konsientisa nos pueblo riba e problematika aki p’asina nos logra nos meta.

Partidonan unanimamente a bai di akuerdo i lo yuda pa kaba ku e a violensia ku ta reina, union ta hasi forsa i ku tur nanishi ta den e mesun direkshon nos lo logra sigur!

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: