Fiansa di gobiernu na kompania priva Insel Air, apesar ku gobuernu tabata sa ku situashon finansiero ta malu
Na Minister di Finansa i Ekonomia
Señor Kenneth Gijsbertha
PRESENTE
Willemstad, 19 di yüni 2019
Tópiko: Fiansa di gobiernu na kompania priva Insel Air i tambe debe di belasting ku Insel Air no a kumpli kuné
Honorabel Minister Gijsbertha,
Frakshon di MFK a tuma nota durante di e reunion públiko di 10 di yüni último, ku Minister Presidente Eugene Rhuggenaath a duna eks Minister Presidente señor Gilmar Pisas rason riba su deklarashon durante di su mandato ku Kòrsou ta praktikamente bankarota.
Den e mesun deklarashon aki Minister Presidente Eugene Rhuggenaath a deklará ku for di komienso di 2017, gobiernu tabata sa ku Kòrsou su situashon finansiero no tabata bon.
E deklarashon aki a laga un smak amargo serka mi persona, debí ku mi no por komprondé kon un gobiernu responsabel ta konstatá ku situashon finansiero di Kòrsou ta super delikado, pero ta opta pa duna un kompania priva 33 mion den e situashon finansiero ku Kòrsou ta pasando aden.
Mi ta konsiente ku tabatin hopi diskushon riba e manera ku gobiernu a atendé ku un kompania Priva manera Insel Air. A kue sèn di belasting di pueblo di Kòrsou i a hinka esaki den un bari sin bòm i tur esaki kontra di konsehonan di departamento di finansa ku ta kai bou di Minister Gijsbertha su responsabilidat.
Nos ta konsiderá ku e asuntu di Insel Air aki no por kaba na aros i koko, mester pone un hende responsabel pa e akto aki ku a perhudiká Kòrsou finansieramente.
Hasiendo uso di artíkulo 96 di reglamentu di órden suskrito ta hasi Minister Gijsbertha e siguiente preguntanan;
- Ta bèrdat ku tabata konosí serka bo persona tambe ku situashon finansiero di Kòrsou ta hopi malu (bankarota) for di komienso di aña 2017?
- Minister por informá Parlamento kuantu sèn total di plaka di belasting di pueblo di Kòrsou a wòrdu fia (regalá) na Insel Air?
- Minister por informá Parlamento kuantu ta e montante di e fiansa ku Curaçao Airport Holding (CAH) a para garantia p’e na un banko lokal pa Insel Air?
- Awor ku Insel Air a wòrdu deklará bankarota, ken ta pagando e fiansa ku CAH a para garantia p’e?
- Dikon si tabata tin un konseho negativo di parti di departamento di finansa, bo persona responsabel pa finansa públiko, tòg a bai di akuerdo pa fasilitá Insel Air e fiansa (regalo) aki. Miéntras ku tur kos tabata indiká ku Insel Air lo no por a sobrebibí, ku tur debenan ku e tin?
- Kiko konkretamente Minister ta hasiendo pa rekuperá pueblo di Kòrsou su sèn di belasting bek?
- Kuantu ta e suma total ku Insel Air a keda debe na belasting i primanan sosial?
- Minister mester ta haña ku gabinete Rhuggenaath a aktua korekto den hinter e asuntu di Insel Air aki i ku ta hustu ku pueblo di Kòrsou mester a pèrdè tur e sèn ku a wòrdu hinka den Insel Air, mas belasting i primanan sosial?
- Ken segun Minister mester wòrdu pone responsabel pa e desishon aki ku a perhudiká Kòrsou pa miónes di florin?
Suskrito i frakshon di MFK ta spera ku Minister Gijsbertha ta tuma bon nota di e preguntanan aki i ku minister lo kontestá e preguntanan den e tempu stipulá pa nos Reglamento di Orden i tambe e protokòl firma entre gobièrnu i Parlamento di Kòrsou.
Nos ta bolbe ripití ku no por ta asina ku Kòrsou ta wòrdu perhudiká pa miónes i no ta pone ningun persona responsabel pa esaki.
Atentamente,
Gilbert Doran
Miembro di Parlamento
pa Frakshon di MFK
Na: Presidente di Parlamento di Kòrsou
Sr. W. Millerson
Wilhelminaplein # 4
PRESENTE
Kòrsou, 19 di yüni 2019
Apresiabel Señor Millerson,
Pa medio di e karta aki, hasiendo uso di artíkulo 96 di reglamentu di órden
di Parlamento, mi ke pidi bo persona pa dirigí e karta athunto na Minister Kenneth Gijsbertha enkargá ku Finansa Públiko i Ekonomia, ku preguntanan ku mi persona ta hasi na e minister konserní.
Danki pa e koperashon.
Atentamente,
Gilbert Doran
Miembro di Parlamento
Frakshon di MFK
