Reunion públiko ku karakter di urgensia relashoná futuro di refineria Isla i karta di presidente di PDVSA na empleadonan di refineria Isla, kaminda e ta ekspresá ku Venezuela ta dispuesto pa sigui manehá nos refineria 

Willemstad, 25 di yuni 2019

Na Presidente di Parlamento

Señor  W. Millerson

p/a Wilhelminaplein # 4

Presente

 

Tópiko: Reunion públiko ku karakter di urgensia relashoná futuro di refineria Isla i karta di presidente di PDVSA na empleadonan di refineria Isla, kaminda e ta ekspresá ku Venezuela ta dispuesto pa sigui manehá nos refineria 

Señor Presidente,

Frakshon di MFK a tuma nota den medionan di komunikashon i tambe pa medio di empleadonan di Refineria Isla di un karta, di e Minister Manuel Quevedo kende alabes ta presidente di PDVSA. Den e karta aki e Minister ta ekspresá na empleadonan, e deseo di Venezuela pa kontinuá ku operashon di nos refineria.

Nos frakshon ta di opinion ku e karta aki na promé instante mester a wòrdu dirigí na Gobiernu di Kòrsou, komo doño di nos refineria, apesar ku e karta no a bai pa gobiernu di Kòrsou, no mester keda sin atendé e opshon ku a presentá aki. Teniendo na kuenta importansia di refineria mester tuma e pasonan nesesario pa wak ku si di bèrdat Venezuela tin e boluntat pa kontinuá ku operashon di e refineria.

Nos ta lamentá ku gabinete Rhuggenaath despues ku e karta aki a sali den prensa no a hasi ningun deklarashon ofisial na e empleadonan di refineria Isla ku ta bibando momentonan di angustia, debí ku nan no sa kiko futuro lo trese pa nan.

E karta di parti di Venezuela a trese speransa serka e empleadonan di Refineria i ta deber di nos komo mandatario pa no laga ningun hende hunga ku sentimentu di e empleadonan di refineria Isla. Ta p’esei frakshon di MFK ta pidi e reunion aki ku karakter di urgensia, pa e empleadonan por wòrdu informá kon gobiernu di Kòrsou ta posishoná su mes pa ku e karta di parti di presidente di PDVSA

Frakshon di MFK konforme artíkulo 64 insiso 4 di nos Reglamento di Ordu, ta pidi bo persona pa konvoká e reunion aki ku karakter di urgensia. Pa asina Parlamento por debatí i tuma un posishon riba e karta aki.

Pa e reunion en aki nos ta pidi pa bo pa invitá Minister Presidente Eugene Rhuggenaath pa ta presente.

Atentamente,

Na nòmber di frakshon di MFK

Charles Cooper                        Gilbert Doran                                    Juniël Carolina

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: