REI DI TUMBA DI BISHITA SERKA MINISTER CAMELIA-RÖMER

REI DI TUMBA DI BISHITA SERKA MINISTER CAMELIA-RÖMER 

Willemstad – Dia 29 di yanüari den transkurso di mainta Kòrsou su rei di tumba a hasi un bishita di kortesia serka minister Camelia-Römer. Rei di tumba Urvin Jano ta un trahadó di e ministerio di Salú, Medio Ambiente i Naturalesa. E ta traha den e departamentu ku ántes tabata milieu dienst. Dunando honor na Urvin komo trahadó di e ministerio minister tambe a duna honor na Axel Pikero ku ta traha den su gabinete. Loke ku minister ta sumamente kontentu ku n’e ta ku banda di ta dibertí otro, alegrá bida di otro ku nan kanto i músika, tur dos ta trahadó hopi serio i responsabel den nan trabou. 

Minister Camelia -Römer ta boga pa salú den trabou tambe. I kiko mas ku músika ku ta alegrá hende den nan bida diario. Nos ministerio por ta gradesido di tin personanan ku mas ku na un manera ta aportá na salú riba trabou. Urvin Jano ta forma parti di e team ku ta kontrolá i supervisá kuido di nos medioambiente i naturalesa. E ta un trahadó ku ta hopi habrí pa ku su koleganan den e trabou diario, tambe e ta hasi tur esfuerso pa por kumpli mas mihó ku su trabou tur dia i ta bai tur kurso pa por duna ainda mas na su trabou. E ta un persona ku no sa falta trabou i ta na tempu semper. Su empeño pa partisipá na e festival di e aña aki a keda koroná maske ku e tabatin algun kontra tèmpo i sirkunstansha ménos faborabel paso su banda no tabata na Kòrsou. Esaki ta demostrá e seriedat ku e tin den loke e ta hasi. Su entusiasmo tabata grandi i su inspirashon a sali fo’i su trabou mes tambe. E lus pa Kòrsou i su trabou pa nos por siña wak kos un tiki mas positivo i duna aporte kaminda por. Esaki el a kompartí ku su koleganan i tur a akseptá su partisipashon i hopi a haña e chèns kaba pa felisit’é.  

Den un kombersashon ameno Urvin I Axel a kompartí nan eksperensha di festival di tumba ku minister Camelia-Römer ku su kolaboradornan i tambe tim di maneho di GMN i parlamentario Renox Calmes i su kolaboradornan. 

Minister Camelia -Römer ta deseá Urvin Jano, Axel Pikero i tur músiko i karnavalista hopi felisidat i alegria durante di e temporada di karnaval. Natural ku e súplika pa representá tambe e ministerio di Salú, Medio Ambiente i Naturalesa mas mihó posibel. Tambe e minister ta pidi tur hende pa komportá nan mes i kuida nan kurpa i di esnan ku nan ta responsabel pe manera  nan yunan. Hasi tur kos na midí paso despues di karnaval nos ke sigui ku un bida saludabel.  

Pabien tambe na nos rei/na  di tumba hubenil ……….

FELIS KARNAVAL 2018.