Minister. Di Eseñansa, Ciencia y Desaroyo Sostenibel Sr. Rudy Lampe: MANEHO NOBO PA AÑA ESCOLAR 2019-2020
Minister. Di Eseñansa, Ciencia y Desaroyo Sostenibel Sr. Rudy Lampe:
MANEHO NOBO PA AÑA ESCOLAR 2019-2020
Den conferencia di prensa diahuebs 18 di juli, Minister di Enseñansa a splica riba e
maneho nobo cu a wordo introduci pa aña escolar 2019-2020. Pa e aña venidero a bin cu un “Nationale Toets” cual ta un examen nacional cu tur mucha den 6de klas mester a pasa, y basa riba e resultado di e examen aki y e conseho di scol ta determina unda e alumno aki lo bay.
“Si e conseho di scol ta bisa HAVO y e resultado di examen ta bisa MAVO, e alumno aki lo bay HAVO pa motibo cu e score di mas halto ta conta”.
Segun Minister Lampe, ta pa e motibo aki tambe a surgi un crecemento den e fluho total di alumnonan cu a logra pa bay HAVO cu a resulta den e decision pa cuminsa cu un “dependance” di colegio San Nicolas. Mirando cu Colegio San Nicolas ta un scol publico y ta cay bou Minister di Enseñansa, e ta responsabilidad di Gobierno e ora pa tur e alumnonan aki cu a score pa HAVO haya un luga pa atende nan lesnan.
Ta hopi importante pa notifica cu si acaso un alumno ta bay scol catolico of protestant y no por haya luga na Colegio Arubano, cu nan por inscribi libremente online pa Colegio San Nicolas pa asina nan por cuminsa cu nan estudio na augustus 2019. Segun Minister Lampe, Gobierno ta premira cu e fluho di studiante pa HAVO pabou di brug lo bay aumenta drasticamente p’esey tambe Gobierno di Aruba ta prepara pa tin tur cos cla pa duna e servicio cu e alumnonan aki tin derecho riba dje.
Pa aclarea confusion di hopi mayornan, Colegio San Nicolas ta un scol publico, Colegio Arubano ta un scol Catolico y SMOA tin un directiva catolico y pa e motibo aki Colegio San Nicolas ta habri pa tur alumno. Si den caso un mucha ta inscribi na SKOA y ta poni pa bay HAVO y Colegio Arubano no tin luga, nan tin tur derecho pa inscribi na Colegio San Nicolas pa haya un luga pa cuminsa e aña escolar nobo.
Ta hopi importante pa notifica tur alumno cu e “dependance” di Colegio San Nicolas cu Gobierno ta preparando ta na Centro di Bario Dakota.
