Minister. Di Eseñansa, Ciencia y Desaroyo Sostenibel Sr. Rudy Lampe Minister Lampe ta aclarea e carta manda pa directivanan di scol NIUN MOMENTO A SER PAPIA CU TA BAY CORTA DEN SALARIO DI MAESTRONAN

Minister. Di Eseñansa, Ciencia y Desaroyo Sostenibel Sr. Rudy Lampe

Minister Lampe ta aclarea e carta manda pa directivanan di scol

NIUN MOMENTO A SER PAPIA CU TA BAY CORTA DEN SALARIO DI MAESTRONAN

 

Den conferencia di prensa di Gobierno di Aruba dialuna juli 28, Minister di Enseñansa Rudy Lampe a clarifica e malinterpretacion riba un carta cu a sali di Directie Onderwijs pa e directivanan di scol. Segun Minister Rudy Lampe, Gobierno anterior semper a traha over di e presupuesto cu nan tawatin firma y aproba pa Parlamento pues cu consecuencia cu cada rato mester a bay bek Parlamento pa pidi aprobacion pa un presupuesto adicional.  

 

Pa por cubri tur e gastonan aki e gobierno anterior tawata fia placa riba Mercado internacional sin aprobacion di Parlamento causando cu awe Aruba ta den un situacion financiero deplorabel. Esaki sigur no ta e maneho cu Gabinete Wever-Croes ta hibando y pa prome biaha a pasa un begroting den Parlamento sin un “suppletoire begroting”. E presupuesto no a ser surpasa cual ta un logra grandi y ta mustra cu e Gobierno actual ta cumpli. E maneho di Gabinete Wever-Croes ta rekeri cu e presupuesto di Gobeirno actual tin cu ser evalua cada 6 luna pa asina tin un miho bista di e gastonan, entradanan y tambe pa asegura cu cada departamento ta trahando dentro di nan presupuesto aproba. 

 

Den cuadro cu esaki a bin realisa cu si sigui cu e “trend” aki e presupuesto di Enseñansa lo ser surpasa pa loke ta trata e salarionan y esaki tawata e motibo cu Gobierno actual a tuma e decision pa ahusta e “overuren” nan. Di e presupuesto di Enseñansa 87% ta bay na salarionan y e resto ta bay casi completo den e huurnan pa loke ta trata e departamentonan pa cu Enseñansa causando cu no tin margen pa mas gastonan.

 

Mirando e problematica aki Minister Rudy Lampe a manda un carta pa e directivanan di Enseñansa pa pone nan altanto di e situacion y wak con por coregi e “trend” aki pa e presupuesto di 2019 pa loke ta trata Enseñansa no ser surpasa. Pa cuminsa delibera riba posibel solucionnan, Directie Onderwijs a manda un carta pa e directivanan di scol y ta hopi lamentabel pa bisa cu di imediato esaki a wordo circula pa prensa y aki ta unda e malinterpretacionnan a cuminsa entre comunidad di Aruba. 

 

E prome malinterpretacion ta loke ta trata “overuren” y aki ta unda Minister Lampe a sigura cu nada ta bay wordo cambia loke ta trata e custumber di “overuren”, pero si e exceso ta bay wordo coregi. E discucion di “overuren” no ta recarda ni maestronan di scol preparatorio ni scol primario pero exclusivamente maestronan di MAVO, HAVO, IPA y EPI na unda mester permiti orarionan extra pa cubri e escases di maestronan pa cierto materianan manera wiskunde. Loke no ta bay wordo permiti mas ta pa un maestro haya mas di 8 ora extra surpasando e total di 40 oranan di un maestro ya cu esaki tambe ta implica oranan sin descanso y cu lo resulta na “ziekteverzuim” den futuro.  

 

Otro punto cu tambe a ser malinterpreta ta cu ta bay haci e klasnan mas grandi aumentando e cantidad di alumnonan pa klas. Esaki tampoco ta cuadra cu e berdad. Loke e carta ta indica ta un maneho di subsidio cu loke Gobierno ta bay duna e directivanan di scol tin cu wordo calcula a base di e cantidad di mucha y na e mesun momento e subsidio pa salario tambe ta ser basa riba e cantidad di mucha pa klas. Na niun momento a ser bisa cu tur klas mester consisti di 28 mucha. 

 

“Losse uren” tambe a ser malinterpreta ya cu ta ser bisa cu maestronan no por duna les mas manera na un Enseñansa pa Empleo. Esaki tampoco ta cuadra cu e berdad. Maestronan por sigui duna les den nan tempo liber pero esaki lo ser paga segun un “losse uren” contract y no riba bo mesun contract como “overuren”.  Cada maestro cu kier duna les den nan tempo liber ta liber pa haci esaki solamente nan lo wordo paga pa e oranan cu nan a traha segun e contract. 

 

Por ultimo Gobierno di Aruba kier a sugeri e maestronan pa reduci nan taak uren na 1/8 deel p.e. si tin un MB di 32 ora kiermeen tin 20 lesuur y 12 taak uur nos di Gabinete Wever-Croes kier a sugeri pa cambia esaki den 28 lesuur y 4 taak uur. 

 

Minister Lampe a enfatisa cu niun momento a ser papia den e carta cu ta bay corta den salario di niun hende pero Gobierno ta purbando na trece solucionnan pa asina por maneha e presupuesto di Enseñansa di un manera cu e no lo wordo surpasa.