Advertisements

Den tempunan di desigualdat persistente, ku tin influensia grandi riba futuro di trabou i riba posishon i dignidat di trahadónan, ta di sumo importansia pa hasi bon uso di oportunidatnan ku ta presentá nan mes i atendé di un manera diligente ku e retonan tambe pa purba logra krea un futuro di trabou hustu, inklusivo i sigur ku por garantisá trabou digno pa un i tur. Un futuro di trabou asina ei ta fundamental pa un desaroyo duradero kaminda por krea un klima den kua ta eradiká pobresa i ningun hende no ta wòrdu ekskluí. E pregunta kardinal ta: Kòrsou ta kla pa esei?”

WILLEMSTAD, 01Ougùstùs 2019 – ,,Den tempunan di desigualdat persistente, ku tin influensia grandi riba futuro di trabou i riba posishon i dignidat di trahadónan, ta di sumo importansia pa hasi bon uso di oportunidatnan ku ta presentá nan mes i atendé di un manera diligente ku e retonan tambe pa purba logra krea un futuro di trabou hustu, inklusivo i sigur ku por garantisá trabou digno pa un i tur. Un futuro di trabou asina ei ta fundamental pa un desaroyo duradero kaminda por krea un klima den kua ta eradiká pobresa i ningun hende no ta wòrdu ekskluí. E pregunta kardinal ta: Kòrsou ta kla pa esei?”

E pregunta aki a ser poné dilanti di un oudiensia di mas ku 130 hende durante e diskushon di pènel titulá ‘It’s the Economy, Stupid’ ku a wòrdu tené djaweps dia 25 di yüli último den Atrium di Renaissance Curaçao & Casino. E diskushon di pènel a wòrdu organisá pa Universidat di Maneho (dr. Miguel Goede) i di spònser dor di Kámara di Komèrsio i Industria i MCB Bank.

Panelistanan tabata Direktor / Sekretario general di Konseho Sosial Ekonómiko (SER) drs. Raul Henriquez, Konsehero hurídiko di SER sra. mr. Miloushka Sboui-Racamy, èks Minister di Desaroyo Ekonómiko dr. Steven Martina, Direktor di Ofisina Sentral di Estadístika (CBS) drs. Sean de Boer, presidente di Kámara di Komèrsio i Industria sr. Billy Jonkheer i e empresario i miembro di direktiva di Kámara di Komèrsio sr. Renato Ignacio.

Durante e presentashon di e delegashon tékniko di SER a asentuá e nesesidat di ta involukrá direktamente ku e transformashonnan ku ta tumando lugá den mundu di trabou, indusí pa inovashonnan teknológiko, kambionan demográfiko, kambionan klimatológiko i medio ambiental i un globalisashon aselerá.

E konseheronan di SER ta rekonosé e echo ku Kòrsou ta pasando den un periodo ku retonan grandi. Sinembargo kolektivamente mester identifiká i optimalisá e potensialnan di un futuro merkado laboral. ,,Atenshon mester ser poné riba por ehèmpel atraé talento hóben i bon prepará ku un mentalidat di hasi negoshi, preferiblemente for di region mes. Esaki lo tin un impakto signifikante riba dinámika riba merkado laboral lokal. Tambe mester stimulá mobilidat laboral entre sektornan (públiko, privá, offshore, onshore) ku te ainda ta basta segregá. Ademas mester atendé di un manera diligente i responsabel ku e defisiensianan institushonal struktural di pais. Gastunan di e aparato públiko ta relativamente altu en komparashon ku e nivel i kalidat ku e aparato ta duna na komunidat i na sektor privá. Ta karesé di sufisiente efisiensia i efikasia; pa e motibu ei inovashonnan fundamental riba nivel institushonal ta indispensabel.”

Mas aleu e konseheronan di SER a enfatisá, mirando evolushon di trabou, riba e importansia grandi di restrukturá institutonan edukashonal eksistente di un manera ku nan por respondé adekuadamente i efektivamente riba demandanan nobo riba merkado laboral. ,,E konsepto di lifelong learning i enseñansa di kalidat lo alsa e posibilidat pa atkerí trabou digno.”

Tambe nan a trese pa dilanti e nesesidat di implementá maneho i bini ku insentivanan pa un kresementu ekonómiko inklusivo i sostenibel, ku atenshon pa inovashonnan i pa un transishon di ekonomia informal (sigun kálkulonan aktualmente 40 porshento) na ekonomia formal.

Por último a enfatisá riba e nesesidat agudo di un kambio di ‘mindset’ kolektivo ku ta amplia posibilidatnan riba merkado laboral.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: