‘Loonwijzer’ (Indikashon salarial) pa Kòrsou

‘Loonwijzer’ (Indikashon salarial) pa Kòrsou

Geplaatst op 8 Ougùstùs 2019 dor di Ministerio di Enseñansa, Siensia, Kultura & Deporte

Bo ke tin un indikashon di e salario mará na bo funshon na Kòrsou? Akudí na kòmpas di salario “on line”: Loonwijzer. Resientemente e grupo di trabou ku a traha riba realisashon di e “Loonwijzer” pa Kòrsou, a keda kla ku e trabou, pa un i tur, pero prinsipalmente pa studiantenan por disponé di informashon aktual i konkreto tokante e salario ku ta pertenesé na kada profeshon.

E grupo di trabou ya menshoná a konsistí di representantenan di e Ministerio di Enseñansa Siensia Kultura i Deporte (ESKD), Ministerio di Desaroyo Ekonómiko, Ministerio di Maneho di Gobernashon, Planifikashon i Servisio Públiko, i tambe di S.S.C. E grupo aki tabatin e tarea pa hasi un inventarisashon di e diferente profeshonnan ku tin riba merkado laboral, tantu den gobièrnu komo den sektor privá i mester a traha un resúmen di e salarionan pa e diferente profeshonnan ku tin na Kòrsou.

E grupo di trabou a hasi inventarisashon di diferente profeshon, traha un resúmen di e sektor i tambe di kada parti di sektor i a inventarisá e salario ku ta kuminsá kuné. E grupo di trabou a entregá resultado di trabou dia 29 di yüni 2019 na Konseho di Minister i aktualmente un i tur por akudí na e siguiente sitio pa informashon tokante profeshon i salario lokal:http://loonwijzer.ministerie-owcs.cw.

E sistema aki ta prinsipalmente importante pa tur studiante di Kòrsou tin un bista adelantá di e salarionan ku ta paga i ta konsiente di tur e implikashonnan ku un debe di estudio haltu por trese kuné i kon esaki por afektá e futuro finansiero di nan i nan futuro famia. Hopi ta realisá esaki despues di e estudio i ora di paga bèk. Di e manera aki komunidat i studiantenan i tur esnan ku ta laborá, tin un sistema digitalisá ku nan por konsultá, ora ke haña un bista di e sektor i parti di sektor i entrada ku ta kuminsá kuné mará na kada profeshon. E sistema ta un sistema ku lo krese segun mas informashon i dato ta disponibel tokante nos merkado laboral.

Minister di ESKD sra. Marilyn Alcalá-Wallé ta rekomendá un i tur pa bishitá e siguiente sitio: http://loonwijzer.ministerie-owcs.cw/

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: