Direktiva di MAN a trata karta di Hensley Koeiman den kua riba inisiativa propio e ta pone su posishon komo Lider Polítiko di Partido MAN na disposishon di Partido.

Direktiva di MAN a trata karta di Hensley Koeiman den kua riba inisiativa propio e ta pone su posishon komo Lider Polítiko di Partido MAN na disposishon di Partido.

Willemstad, 11 di ougùstùs 2019.

Mediante un karta fechá 23 di aprel 2019 Hensley F. Koeiman riba inisiativa propio a pone su funshon di Lider Polítiko na disposishon di partido MAN.

Den konkordansia ku Hensley, teniendo na kuenta ku diferente tópikonan di interes general di pais Kòrsou i di partido, ku a rekerí atenshon i akshon di partido MAN, no tabata oportuno pa direktiva trata e karta aki. Entretantu e karta a keda tratá, dia 8 di ougùstùs último durante di un reunion di direktiva.

Despues di deliberashonnan amplio, direktiva a tuma e desishon pa aseptá e hecho ku Hensley Koeiman a pone e funshon di Lider Polítiko na disposishon di partido MAN.
Partido a tuma e desishon tambe, teniendo kuenta ku statuto i reglamentu di kas, pa enkaminá e proseso pa yega na un Lider Polítiko nobo pa partido MAN. Direktiva a informá Hensley por éksito di e desishon aki i a inform’é tambe ku partido MAN lo bai organisá un rekonosimentu pa su persona pa gradisié públikamente pa e trabounan meritorio ku e la desplegá pa partido MAN den e funshon komo Lider Polítiko kaminda e la yuda partido krese i bira un partido grandi bèk ku 5 asiento aktualmente den Parlamento di Kòrsou i e di dos partido mas grandi den koalishon.

Durante e proseso pa yega na un Lider Polítiko nobo, presidente di partido MAN sr. Yves “Payo” Schoop lo fungi temporalmente komo bosero pa partido MAN. E lo sòru pa asina partido MAN sigui duna informashon kontinuo i atendé ku e retonan ku pais ta konfrontá i tambe e retonan polítiko ku presentá durante di e periodo aki.

Despues di un karera briante i respetuoso Hensley Koeiman, manera a wòrdu indiká anteriormente, riba inisiativa propio ta baha di un forma meritorio komo Lider Polítiko di partido MAN i ta duna espasio pa partido sigui traha riba strategia di kresementu di partido.

Primeramente komo miembro di Konseho Insular di Kòrsou i despues komo miembro di Parlamento di Kòrsou, tambe Minister, i asta Promé Minister den Gabinete Koeiman, Hensley por mira atras ku satisfakshon e trabounan ku e la desplegá tantu pa pais Kòrsou komo pa partido MAN. E la ehersé e diferente funshonnan aki hopi biaha den tempunan difísil por ehemplo durante di e kambionan estatal ku a trese kuné diferente reto pa pais Kòrsou.

Hensley a gana rèspèt i simpatia tantu di amigu komo di kontrinkantenan polítiko pa su forma trankil di hiba i hasi polítika. Hensley nunka a falta koleganan rèspèt. Integridat ta algu ku e la karga haltu den su bandera. A ni ora e tabata ser ataká inhustamente Hensley nunka tabata zundra bèk òf tira ku lodo.
Semper e la keda un persona trankil, humilde ku kurason noble i sinsero.

Esaki a hasi di Hensley un persona hopi stimá i gustá, un hende ku tabata inspirá tur hende pa nan trata di saka lo máksimo for di nan mes i semper e la yuda otronan lanta nan outo estima. Durante su presentashonnan den Konseho Insular Hensley tabata enfoká riba e tópiko sin nunka bira personal. Nunka e la trata di mata e mensahero, pero semper e la saka afó kiko tabata e esensia di e mensahe. Komo polítiko Hensley sèmper tabata un haladó di voto (vote-getter) i no opstante esaki nunka e la laga esaki influensha su karakter i su forma di ser. E la keda mes humilde manera semper nos konos’é Hensley.

Komo Lider Polítiko di partido MAN Hensley a sa di guia partido eksitosamente kaminda MAN a krese na voto i hasta a sali na aña 2016 e partido ku a gana elekshon i pa e siguiente elekshon sigui krese na voto.

Ta bon pa aklará ku Hensley lo no bandoná polítika ni tampoko lo no bandoná partido MAN. Hensley awor ku e no ta okupá e funshon di Lider Polítiko, lo konsentrá tur su esfuersonan riba e funshon di Minister di “SOAW”, pa logra kumpli ku e programa di Gobernashon i metanan sosial di partido MAN..

Direktiva di partido MAN i miembronan ta sumamente gradesí i orguyoso pa loke Hensley a hasi i ta hasiendo pa tantu partido MAN, komo pa Pais Kòrsou. Partido ta sumamente satisfecho di e hecho ku Hensley lo sigui su karera polítiko den partido MAN. Esaki lo kontribuí pa partido MAN bira un partido Fuerte, Stabil, Demokrátiko i Bibu.

Un biaha mas na nòmber di tur miembro di partido MAN nos ta gradisí Hensley Koeiman “for a job well done”.

Na nòmber di direktiva di partido MAN

Presidente di partido MAN
Yves Schoop