Parlamentario Curtley Obispo: Kon ta bai garantisá solidaridat di kontribushon i pago na tempu di belasting di vehíkulo dor di tur kontribuyentenan

Minister di Finansa  

Señor Kenneth Gijsbertha

Pietermaai #17/Pietermaai 4-4A

 

Djabièrnè, 6 sèptèmber 2019

 

Tópiko:  Kon ta bai garantisá solidaridat di kontribushon i pago na tempu di belasting di vehíkulo dor di tur kontribuyentenan?

 

Apresiabel señor Minister Kenneth Gijsbertha,

 

Ku referensia na Minister su karta di 19 ougùstùs 2019, numerá 2019/003183 riba kontesta di mi preguntanan ku tópiko: kobransa di impuesto di vehíkulo.  A base di e kontestanan di Minister di Finansa su karta, mi por konstatá ku for di 10 òktober 2010 te ku 31 desèmber 2017, Pais Kòrsou tin un défisit struktural di kontribushon i pago na tempu di belasting di vehíkulo dor di kontribuyentenan. Pendiente e naheffingsaanslagen di e periodo di añanan 2018 i 2019, ainda tin riba kaya pa kobra  un mínimo di 28.6 mion florin, kual ta konsistí di: (a) e periodo promé ku aña 2012 pa un total di 11.6 mion florin, (b) e periodo di añanan 2013 te ku 2016 pa un total di 11.3 mion florin i (c) e periodo di aña 2017 pa un total di 5.7 mion florin. Sifranan ku tambe ta indiká bon kla dikon ainda tin fondonan di kontribushon di belasting di vehíkulo ku no a yega kaha di Pais Kòrsou, pa atendé e retraso den mantenshon di kayanan i kamindanan aki na Kòrsou. 

 

P’esei segun mi opinion e défisit presupuestario struktural aki di kontribushon kolektivo di belasting di vehíkulo, ta eksigí un sentido di urgensia pa solushonnan struktural riba un término korto i mediano. Tambe den e kuadro di mi trabou di kontròl parlamentario mi ke sa kon Minister di Finansa i Gobièrnu di Kòrsou ta bai atendé den futuro pa trese solushonnan struktural,  órden fiskal, sivismo fiskal i un kobransa efektivo pa ku e belasting di vehíkulo.  P’esei mi ta aserka Minister di Finansa hasiendo uso di mi derecho komo parlamentario pa hasi pregunta nan konforme artíkulo  96 di Reglamentu di órden di Parlamento di Kòrsou:  

(1) Ta bai introdusí den aña 2020 un plachi di number nobo pa vehíkulonan, pa asina remplasá e plachi di number di vehíkulonan ku ta data di aña 1999? Si òf No. Dikon Si òf No?

 

(2) Pa garantisá kontribushon i solidaridat di belasting di vehíkulo di tur kontribuyentenan, tin plannan pa e kambia e sistema di kobransa di kontribushon di belasting di vehíkulo aktual  i transformá esaki den un sistema kaminda simultáneamente: (1) ta kobra e tarifanan aktual di belasting di vehíkulo den kombustibel di e vehíkulo na lugá di e sistema aktual i (2) ta introdusí un sticker di keuring pa tur vehíkulonan? Pregunta: Si òf No. Dikon si òf no?

 

3) Kon tin pensá di sigui stimulá e sivismo fiskal i solidaridat di kontribushon i pago na tempu di belasting di vehíkulo dor di tur kontribuyentenan?

 

Atentamente,

 

Curtley Obispo

Parlamentario pa Kòrsou

PAR

This site uses Akismet to reduce spam. Learn how your comment data is processed.

%d bloggers like this: