Oposishon den Parlamento no ta bai akseptá ningun deskriminashon i/òf ku ta trapa riba nos derechinan den e aña Parlamentario Nobo

Oposishon den Parlamento no ta bai akseptá ningun deskriminashon i/òf ku ta trapa riba nos derechinan den e aña Parlamentario Nobo

 

Awe 10 di sèptèmber 2019, nos ta bai sera e aña Parlamentario, Frakshon di MFK tin ku mira bek na un aña 2019 ku a marka un página pretu den nos historia Parlamentario. Pa e manera ku frakshon di MFK a wòrdu trata durante di e aña ku ta tras di lomba, hasta nos por bisa ku nos a wòrdu diskriminá.

 

Tur loke ku frakshon di MFK a bini kuné, pa duna un aporte sea ta moshon i/òf amienda nunka koalishon i inkluso presidente di Parlamento no a bai di akuerdo ku nos puntonan. Nos no mester lubidá ku reunionnan ku nos pidi ta wòrdu konvoká despues di 27, 30, 84, 280, 304 dia.

 

Nos Frakshon a bini ku 3 inisiativa di lei;

 

  1. E inisiativa di lei pa glas skur, te hasta dia di awe nos ta wardando riba gobièrnu ku ta wòrdu sostené pa PAR, MAN i PIN pa kaba di hasi i manda e investigashonnan ku MFK pidi nan. E lei ei ta para ketu wardando riba dia gobièrnu su input i presidente di Parlamento no ta hasi nada riba esaki.

 

  1. E inisiativa di lei pa laga ekstranheronan ku tin mas ku 10 aña trahando aki na Kòrsou i ta pagando nan belasting meskos ku tur siudadano i pa nan tambe tin e oportunidat pa vota, tambe ta para ta warda riba e koalishon pa ser trata den Parlamento.

 

  1. E inisiativa di lei pa Kontrolaria General a ser entrega for di òktober 2018 ya ta práktikamente un aña, esaki ta wardando riba presidente pa konvoká un reunion pa e ser trata, miéntras ku a bende e  kompania di gobièrnu i asina no por hasi un investigashon mas den e kompania en kuestion.

 

Frakshon di MFK a indiká durante di tratamentu di presupuesto pa no trata esaki debí ku e presupuesto no ta den balanse, apesar di e atvertensia aki e 12 miembronan di Parlamento ku ta sostené e gabinete Rhuggenaath, inkluso Presidente di Parlamento a trata esaki tòg. Resultado ta ku dia 14 di yanüari CFT a bisa e gobièrnu i e miembronan di Parlamento ku ta sostené e gobièrnu aki ku e presupuesto mester wòrdu traha di nobo, frakshon di MFK a haña rason un biaha mas. A pone tur nos ponensianan un banda pero ora shon makamba si a bisa meskos ku MFK, mesora gabinete Rhuggenaath a bisa “Ja Meneer dat gaan wij doen”.

 

Hulanda ku a indiká na diferente okashoná ku e tin konfiansa den e gobièrnu aki a duna nan un instrukshon (aanwijzing) loke ta indiká ku gabinete Rhuggenaath tabatin un maneho finansiero desastroso.

 

Gabinete Rhuggenaath a introdusí, medida pa pueblo di Kòrsou bai paga pa e mal maneho finansiero di gabinete Rhuggenaath. Remarkabel ta ku den 24 ora gabinete Rhuggenaath huntu ku su 12 miembro di Parlamento a pasa e medidanan aki kontra pueblo, miéntras ku pa un oumento di suèldu mínimo a dura mas ku 6 luna i di 20% di oumento ku mester a duna inisialmente esaki a bin baha i finalmente e hòmbu chikí a bin haña un miserabel 7% di oumento danki na PAR, MAN i PIN.

 

A firma un “Hoofdlijnenakkoord” ku amigunan di e partidonan ku ta forma gobiernu ku Gobernadó a ninga di firma i manda esaki pa destruí na Hulanda paso tantu gobièrnu di Reino i tambe  Gobernadó e indiká ku aki tabata trata di mal maneho finansiero “Ondeugdelijkheid van Bestuur”.

 

Un aña ku ta bai terminá ku un sla mortal pa e pueblo ta e konstrukshon di un e hospital nobo ku e gobièrnu di PAR, MAN i PIN aki terminando, ku lo bai sali nos mas mecha ku sebu. Un hospital ku tin  strukturanan bon traha pa bai saka mas plaka for di saku di pueblo pa benefisiá “Friends and Family”. E hospital aki lo bai kosta a lo largu nos komunidat e suma di i 800.000 mion florin. Promé ku e hospital aki habri su portanan e ta práktikamente fayit.

 

Ta p’esei frakshon di MFK no ta bai akseptá mas deskriminashon i faltamentu di rèspèt pa oposishon, tantu den sala di Parlamento i ora nos ta hasi nos trabou for di sala di reunion.

 

Oposishon tin derechi di eksistensia den nos sistema demokrátiko.

 

Gilmar “Pik” Pisas

Lider di Frakshon pa MFK

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: