Prome Minister Evelyn Wever-Croes: GOBIERNO TA PROLONGA CIERE DI FRONTERA CU TRES LUNA  Mientras cu Aruba no ta completamente cla y prepara pa e fluho grandi di persona lo mantene e frontera cera

Prome Minister Evelyn Wever-Croes: 

 

GOBIERNO TA PROLONGA CIERE DI FRONTERA CU TRES LUNA 

Mientras cu Aruba no ta completamente cla y prepara pa e fluho grandi di persona lo mantene e frontera cera

 

Gobierno di Aruba a tuma e decision pa mantene frontera cu Venezuela cera y prolonga e ciere cu tres luna mas. Na mei di 2019, momento cu Gobierno di Venezuela a dicidi di habri frontera bek, Gobierno di Aruba a dicidi di cera e frontera pa un luna pa motibo cu Gobierno di Aruba no ta cla pa atende cu e fluho grandi di persona cu lo por bin for di Venezuela. Na luna di juni 2019, Gobierno di Aruba a dicidi di mantene e ciere y prolonga esaki cu tres luna mas. Esaki lo a vence diamars 10 di september. Awor atrobe, Gobierno ta prolonga cu tres luna, te cu dia 10 di december 2019. 

 

Prome Minister Evelyn Wever-Croes a indica cu e motibo di e decision aki di Gobierno di Aruba ta pasobra e situacion di Venezuela ta sigui hopi serio y tambe Aruba ainda ta den e proceso pa trece e pasonan cu ta necesario pa nos por tin un miho control riba e fluho di persona. 

 

“E situacion na Venezuela ta trece hopi preocupacion pa Gobierno. Nos ta sigui e desaroyonan y ta convivi cu e situacion dificil cu ta andando na Venzuela. Tambe nos ta hopi preocupa pa e efecto cu esaki tin riba nos pais, cu sigur ta hopi grandi”. 

 

Prome Minister a duna di conoce cu tambe tin e preocupacion di e costo enorme cu e stituacion ta trece cu n’e, debi specialmente cu Aruba no por importa fruta y berdura for di Venezuela cu e consecuencia cu e prijs pa fruta y berdura ta bira mas caro. 

 

“Henter e tema di Venezuela ta un dilema constante na unda cu mester busca un balanse den kico ta e interes di pueblo y kico ta e riesgonan pa nos comunidad. Constantemente y diariamente, mi ta pone e riesgonan y beneficionan den balanse y na e momentonan aki ainda e balanse ta indica cu nos mester di mantene e frontera cera pa asina nos por tin miho control riba e fluho di persona”, Prome Minister Evelyn Wever-Croes a duna di conoce. 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: