Apertura aña parlamentario 2019 – 2020

Apertura aña parlamentario 2019 – 2020

Geplaatst op 10 Sèptèmber 2019 dor di Ministerio di Asuntunan General i Promé Minister

Su ekselensia Gobernador Lucille George-Wout, aña parlamentario 2019-2020

Señor presidente, honorabel miembronan di parlamento,

Gobièrnu di Kòrsou ta wak bèk riba un aña di prueba i retonan grandi pa hinter komunidat di Kòrsou. E sifranan ekonómiko i di desempleo ta reflehá e realidat ku hopi kas di famia ta bibando aden i e inseguridat ku hopi di nos ko-suidadanonan tin ku nan propio futuro i ku futuro di nos pais. Den e tempunan di prueba aki tin un kredo ku nos tur mester tene na dje: ‘kai, lanta i sigui’, veerkracht, resilience.

No opstante ku e desafionan ta grandi i e kaminda ta difísil, lo hasi tur loke ta nesesario pa bòltu e tormenta perfekto aki, den un rumbo pa rekuperashon, kresementu i bienestar. Esaki ta e enkargo i responsabilidat prinsipal ku Gobièrnu di Kòrsou ta asumí na e momentunan aki. Momentunan den kua resultado di nos deliberashonnan, mester ta determinashon pa hasi eskoho i pa dal bai huntu den akshon.

Den e diskurso di aña pasá, Gobièrnu ya a deskribí e desafionan ekonómiko-finansiero ku ta rekerí hopi atenshon den e próksimo añanan i a presentá e prioridatnan den un strategia ku mester krea e base sólido i integral pa kresementu sosial-ekonómiko na Kòrsou.

Un strategia ku ta firmemente basá riba e konvikshon ku si nos kier mira otro resultado, si nos kier mira kambio fundamental i duradero, nos mester ta determiná pa tuma e desishonnan krusial i hasi e kosnan otro tambe.

Kambio struktural ta bini for di reformanan struktural, entre otro:

  • Reforma di nos finansas públiko i nos sistema fiskal.
  • Reforma den nos struktura ekonómiko pa alsa produktividat, stimulá sektornan nobo i duradero. Desaroyo ekonómiko mester kana man den man ku un desaroyo sosial ku ta empoderá nos hendenan pa ta fuerte i produktivo.
  • Reforma di nos servisio públiko i gobernashon, pa alsa efisiensia i funshonamentu di nos aparato gubernamental pa sirbi nos pais mihó.

Ku e Strategia di Kresementu 2019-2021, Gobièrnu a stipulá un direkshon ku ta konsistí di reformanan nesesario i invershonnan stratégiko pa realisá un Kòrsou mas fuerte, ku perspektiva riba bienestar i prosperidat kompartí.

Señor Presidente,

Den e aña ku a pasa a dal pasonan definitivo. Implementashon di e strategia ta kanando bou di kordinashon di ekspertonan paden i pafó di Gobièrnu, ku un aserkamentu segun un programa  integral ku enfoke riba ehekushon i resultado. Ata aki algun desishon fundamental ku a tuma den kuadro di reformanan struktural:

  • pa fin di aña 2019 lo tin e kuadro pa un Instituto di Invershon Nashonal, InvestCuraçao, ku lo tin e ròl krusial di stimulá nos klima empresarial i finansiá desaroyo duradero. Esaki a base di proyektonan ku rendimentu haltu i areanan inovativo i transformativo pa nos pais, entre otro sektor digital i di logistiká, nos potensial turístiko, sektor kreativo (oraño), e sektor di agrikultura i energia (bèrdè i blou) i desaroyo di areanan ku potensial ekonómiko, manera Rif i nos sentro di suidat Willemstad en general.
  • InvestCuraçao ta e modelo, na analogia di InvestEU, ku durante e krisis ekonómiko na Europa a habri kaminda pa rekuperashon. Lo tin un fondo di garantia ku lo sòru pa mihó ‘match’ di oferta i demanda di kapital pa empresanan i proyektonan inovativo.
  • Pronto ta finalisá e kuadro pa maneho stratégiko di tur tereno i edifisio di gobièrnu. Kaminda por kapitalisá lo hasi esei pa haña fondo pa invertí den desaroyo sosial i ekonómiko.
  • Lo kaba evaluashon pa yega na un maneho stratégiko di kompanianan di gobièrnu, teniendo kuenta ku faktornan sosio-ekonómiko i finansiero, entre otro potensial di dividendo. Despues di un trayektoria di algun aña a bende UTS i esaki a trese fondonan hopi nesesario ku ta traspasá pa e Instituto di Invershon ku ta invertí esaki dirèkt bèk den komunidat.
  • Komishon Red Carpet ya a hasi un promé proposishon di lei pa kambia e kantidat di permit pa ‘horeca’ i hotel di 10 kategoria pa 2, kual ta resultá den un simplifikashon signifikante! I asina lo sigui optimalisá sistema di pèrmit i renobá leinan antikuá na benefisio di e klima di hasi negoshi.

Otro reformanan krusial ku lo traha pronto riba dje huntu ku partnernan privá i sosial den komunidat:

  • Sinkronikashon entre maneho di migrashon, enseñansa i merkado laboral i tambe demanda i oferta di trabou. Esaki ta esensial pa fortifikashon di nos base ekonómiko i mas prosperidat pa mas hende den nos komunidat. Esaki lo ta un esfuerso kompartí di diferente ministerio, huntu ku stakeholder tripartite.
    • Revishon di maneho di subsidio segun rekomendashonnan den rapòrtnan eksistente. Esaki ta enserá strukturá segun demanda i segun efektividat i resultado deseá.
    • Introdukshon di un sistema di kuido moderno i efisiente i tambe establesementu di un Outoridat di Kuido

Señor Presidente,

Mas o menos 60% di trayektonan ku ta forma parti di e Strategia di Kresementu ta inkluí den e Akuerdo di Kresementu ku Gobièrnu di Kòrsou a firma ku Hulanda. Ku e Akuerdo aki, a logra haña espasio finansiero di un total di 180 mion den próksimo 3 añanan pa finansiá nos programa di reforma i invershonnan stratégiko ku lo ‘boost’ aktividatnan ekonómiko rendabel, krea kupo di trabou i pa hasi invershonnan den desaroyo sosial. Tin basta proyekto turístiko den pipeline ku lo resultá den por lo menos 2000 kamber di hotel adishonal i 1500 kupo di trabou imediatamente.

Parti di e fondonan ta pa invertí den e agènda di desaroyo sosial, kaminda e hende, trabou i bario ta e 3 pilarnan. E agènda di desaroyo sosial tin komo punto di salida empoderashon di e suidadano – mucha, hóben i adulto -, subi kalidat di bida den bario ku enfoke riba asistensia na famianan ku mas mester di dje, i fasilitashon di akseso na trabou. Ta pone mas fondo disponibel pa invertí den renobashon di infrastruktura den barionan. Gobièrnu ta sigui invertí pa fasilitá proyektonan ekonómiko i turístiko riba korto plaso, pero tambe den e hende, renobashon den bario i den bibienda i areanan rekreativo.

Gobièrnu ta kere firmemente, ku sin invershonnan kuantioso i sin kresementu struktural, ta difisil mantené finansa sano. Punto di salida di Gobièrnu ta ku nos mes mester tuma responsabilidat pa sanea finansa públiko, na un manera balansá riba un termino di mas aña den kombinashon ku reformanan struktural i invershon. E Akuerdo di Kresementu ta stipulá e ahustenan gubernamental i finansiero ku Gobièrnu ta implementá den e periodo benidero i ta spesifiká areanan kaminda lo por kolaborá ku Hulanda.

Gobièrnu tin bon kla na bista kiko su prioridatnan ta pa añanan benidero i ta komprometé ku Pueblo di Kòrsou, ku na promé lugá ta dirigí tur enfoke riba prioridatnan i sobrá areanan di maneho komplementario, manera stipulá den e Programa di Gobernashon 2017-2021.

Sr. Presidente,

Pa Ministerio di Finansa, e reto- i prioridatnan pa añanan 2019-2020 i pa mas aña, ta pa realisá un presupuesto ekilibrá. Revishon i reforma di leinan di impuesto lokal i internashonal ta hopi esensial pa sostené desaroyo sosial-ekonómiko na un manera strukturá i duradero.

Fortifikashon di maneho finansiero general den tur ministerio ta importante i mester kontribuí pa garantisá konfiabilidat di sifra i yega na kuenta anual 2021 aprobá pa Kontrolaria General. Nos a tuma pasonan determinante den 2019 pa logra esaki. Ademas mester hasi tur esfuerso pa krea espasio den presupuesto, pa inisiá ku e proseso pa redusí nos debe nashonal.

Ta sigui kaminá e proseso pa integrashon di inspekshon. Rekoudashon i kontròl di impuesto den un solo entidat ta determinante pa mehorá servisio na kliente i garantisá entrada den kaha di Gobièrnu.

Servisio di aduana mester keda reforsá i ekipá ku instrumentonan nesesario pa por protehá nos komunidat, garantisá produkto di kalidat i kombatí komersio ilegal. Finansa públiko ta di nos tur i ta impaktá nos tur, p’esei Gobièrnu ta hasi un apelashon na hinter nos komunidat pa kumpli ku nos leinan fiskal i primanan sosial debidamente.

Señor Presidente,

Pa atende ku eksito e retonan finansiero i ekonómiko ku nos pais ta enfrentá, ta rekerí un aparato públiko ku ta konsistí di hendenan kapás, di hendenan honesto i di hendenan servisial. Ademas, e sirkunstansianan di trabou i e hèrmèntnan di trabou mester ta adekuá.

Ministerio di Gobernashon, Planifikashon i Servisio públiko, durante di e aña benidero, lo enfoká riba proyektonan ku ta sirbi hustamente realisashon di e aparato públiko ku ta funshoná i produsí konforme e deseo di komunidat i ta brinda servisio i produkto ku ta kumpli ku e ekspektativa di e komunidat.

Un proyekto den e kuadro aki ta inisio di e asina yamá Akademia di Gobernashon den aña 2019. Den e promé fase lo brinda kursonan básiko riba área di derecho estatal i atministrativo, leinan relashoná ku derechonan i obligashonnan di un empleado públiko. Den e di dos fase, durante di 2020, lo kuminsá ku kursonan asina yamá ‘functiegericht’. Asina ei gradualmente lo duna e akademia kontenido. Esaki ta duna e empleado públiko tambe perspektiva i oportunidat di krese den su trabou.

E proseso di introdukshon di e-Government tambe ta haña mas kontenido pa medio di ‘Vergunningenloket’ komo front-office kaminda e siudadano por akudí, ‘online’, pa asuntunan di pèrmit. Esaki pa yega na un komunidat bon sirbi! Otro trayektonan importante, manera independisashon di Konseho Supremo Elektoral i lantamentu di Ofisina di Integridat, ta sigui gosa di prioridat. Nos ta keda eksplorá avenidanan pa kompletá finansiamentu.

Señor presidente,

Ministerio di Transporte, Trafiko i Planifikashon Urbano tin un ròl importante pa desaroyo ekonómiko duradero di nos país i kontribuí na kalidat di bida di tur suidadano. Algun di e areanan aki ta: bibienda, transporte den tur su aspektonan -marítimo, aéreo i terrestre-, ku atenshon spesial pa konektividat aéreo.

Ta bai sigui traha riba:

  1. Unu, un vishon pa maneho di kosta, p’ asina atendé di un manera transparente i korekto ku e leinan eksistente, teniendo kuenta ku desaroyonan ekonómiko manera turismo;
  2. Mehorashon di mobilidat di persona riba nos kareteranan publiko;
  3. Oumento di nivel di seguridat den nos tráfiko;

I e Ministerio por wak bèk tambe riba algun logro konkreto:

  • un akuerdo pa atende ku parkeo den sentro di siudat;
  • un akuerdo riba lineanan grandi ku FKP i aworaki ta trahando riba e akuerdo di maneho entre e Ministerio i FKP;
  • Realisashon di e diferente proyektonan di bibienda, rekreashon i infrastruktura urbano, finansiá dor di Fondo Oropeo den 4 bario rònt Kòrsou ku ta Nort Sapaté, Kortijn, Tera Kòra i Nieuw Nederland.

Desaroyo den area di Rif, Zakitó i Otrobanda

Rif ta un programa ehemplar kaminda invershon públiko i privá ta kana huntu i kaminda ta mustra ku tin konfiansa den nos ekonomia i nos hendenan. Tres kadena di hotel ta invertí un suma kuantioso pa remodelá un hotel eksistente (Renaissance, Corendon i Dreams), Marriott su renobashon a kompletá i pronto ta inisiá konstrukshon di un hotel nobo ku ta Courtyard Marriott. Desaroyonan ku ta nifiká mas kupo di trabou na Kòrsou.

Na Ser’i Otrobanda i besindario, invershonistanan lokal ta invertí den renobashon di e area. Kaya Kaya ta un resultado bibu di e konfiansa di invershonistanan lokal i vishon di habitantenan den esaki. Den area di Zakito lo bini desaroyo bèrde tambe den forma di ‘Zakito cooling district, un proyekto pa proveé aire akondishoná for di fuente di laman hundu pa hinter e area. Un inovashon mas pa nos isla i pa Karibe. Turista i habitantenan pronto lo por disfrutá di un parke di pal’i mangel limpi i salú i un area rekreativo vibrante i úniko pa Kòrsou!

Desaroyo den area di Punda, Scharloo i Pietermaai

Gobièrnu a traha huntu ku organisashon di proyekto di Nashonnan Uni riba un vishon pa nos sentro di siudat. E vishon aki ta tene kuenta ku tur nos balornan i tambe nos status komo Patrimonio Mundial. E estudio aki ta forma e kuadro pa Gobièrnu i tambe sektor privá pa stimulá desaroyo di potensial di nos sentro di suidat. Gobièrnu a otorgá permit di konstrukshon konforme e vishon, pa proyekto di desaroyo na Marichi den Punda i na Skalo. Pronto lo tin un konferensia riba invershon den nos sentro di suidat den kolaborashon ku sektor privá.

Señor Presidente,

Un Kòrsou próspero ta dependé di un ekonomia fuerte ku ta diversifiká, duradero, kompetitivo i ku ta krea trabou pa tur su habitantenan. Aunke den 2020 ahinda nos lo tin retonan finansiero, ta sumamente importante pa implementá entre otro e Strategia di Kresementu pa asina nos por ‘jumpstart’ nos ekonomia, traha riba reformanan struktural i logra desaroyo duradero.

E strategia pa realisá kambionan struktural i positivo pa nos ekonomia ta un proseso ku lo dura algun aña. Den 2020, Ministerio di Desaroyo Ekonómiko lo keda duna prioridat na e trayekto pa mehorá nos struktura ekonómiko dor di eliminá Red Tape. Nos lo logra esaki dor di simplifiká i digitalisá e proseso pa entregá e diferente pèrmitnan ekonómiko. Tambe lo kambia e sistema pa ehekutá kòntròl despues di a entregá permit, no promé ku haña pèrmit.

Un otro prioridat ta krea mas pilar ekonómiko. Un pilar ku aktualmente nos ta desaroya mas fuerte ta e sektor di eksportashon pa diversifiká nos ekonomia. Nos ta stimulá kompanianan lokal den tur sektor pa eksportá nan produktonan i servisionan. Tambe lo duna guía na e empresarionan ku tin mester yudansa riba e tereno aki. Ya pa dos aña kaba ta organisá e Siman di Konsientisashon pa Eksportashon (National Export Awareness Week) i e aña aki a kuminsá ku formulashon di un Strategia Nashonal pa Eksportashon bou di guia di International Trade Centre ku tin su sede na Ginebra, Suisa.

Implementashon di e maneho di Empresa Mediano i Chikitu (MKB) ta otro prioridat di MEO paso ta nan ta wesu di lomba di ekonomia di un pais. P’esei e meta pa krea i pone disponibel instrumentonan adaptá na nesesidat di kompanianan i p’asina nan por fortiká nan kompania lokal i/òf internashonal.

Señor Presidente,

E servisio i produktonan di Ministerio di Desaroyo Sosial, Labor i Bienestar ta krusa bida di kasi tur siudadano di Kòrsou. Esaki ta un privilegio i alabes tambe un responsabilidat grandi. Ministerio di Desaroyo Sosial, Labor i Bienestar ta sigui traha pa mehorá i inová e servisio i produktonan ku e ta ofresé na nos pueblo. Den e aña benidero e ministerio ta move pa dilanti ku enfoke riba e tema di “resilience”, òf den otro palabra “kai lanta i sigui!”. Esaki ta sentral den e agènda di desaroyo sosial ku ta parti di e Strategia di Kresementu. Tin programanan detayá kla pa implementá pa ekipá e hende pa yega na un mihó perspektiva i kalidat di bida, apesar di kontratiempo ku e por enkontrá na kaminda. Tambe e programanan ta enfoká riba preparashon di nos pueblo pa asina tur hende por tin un mihó chèns pa ekselá riba merkado laboral.

A hasi preparashonnan pa lansa un Instituto Nashonal pa Formashon kontinuo riba tereno di kapasitashon laboral. Tambe ta bai intensivá i reforsá e kapasidat di kòntròl pa garantisá “trabou desente pa nos trahadónan”. Alabes e Ministerio a identifiká programanan pa desaroyo duradero den barionan, ku pronto lo traha riba dje na un manera integral, den kolaborashon ku otro ministerionan i partnernan den komunidat. Algun di e programa i/o proyektonan ta enserá kuminda pa muchanan ku mas mester, yudansa pa aliviá debe ‘schuldhulpverlening’, renovashon di sentronan di bario, fondo di garantia pa evita mas tantu posibel ku personanan ku pèrde trabou ta pèrdè nan kas, guia intensivo pa famianan ku tin varios reto agudo i sosten kontinuo pa esnan ku ta laborá i/o buska trabou. Tur esaki ta posibel si e ministerio mes tambe ta fuerte pará. Pues ta duna hopi atenshon den e aña benidero na mihó funshonamentu di e ministerio, desaroyo di e empleado públiko, mehorá kalidat di servisio, aktualisá diferente maneho i leinan, en espesial nos leinan laboral.

Señor Presidente,

E aserkamentu holístiko di salú di hende, “wellness”, ku ta kore komo un liña kòrá den e vishon di e Ministerio Salú, Medio Ambiente i Naturalesa, a haña forma den e añanan tras di lomba i ta kontinuá. Hende ta bira mas konsiente di un mihó alimentashon, moveshon, bida mas balansá i nesesidat pa krea mihó ambiente pa biba aden.

E programa “Kunukito” di kas, den barionan i na skolnan lo intensivá den e aña benidero. Esaki ta kompañá ku mas programanan edukashonal ku e meta pa promové salú. Tambe e kondishonnan ku a ser kreá pa medisina alternativo, komplementario i integrativo ta na lugá. Aserkamentu di esnan mas vulnerabel, manera grandinan i mucha,  tambe lo ta dirigí riba promoshon di salú. Dignidat di un pueblo ta fuertemente mará na seguridat i soberanía alimentisio. P’esei, agrikultura, krio di bestia i peska a konosé un desaroyo ku e meta pa remplasá importashon. Gobièrnu lo sigi saka un man pa e produktor lokal por produsí mas i miho kalidat.

Apesar di hopi reto, a konbertí konstrukshon di hospital nobo den un oportunidat pa trese kambionan importante. E ehersisionan pa baha gastunan di remedi, speshalista i mandamentu di hende den eksterior tin un bon fundeshi awor ku e kadena di kuido ta mihó akoplá.

Medio ambiente i naturalesa tambe lo sigi ta opheto di atenshon kontinuo. Lo aselerá trahamentu di leinan pa kuida nos playanan, mondinan i habitatnan marino manera Palu di Mangel i intensivá kòntròl riba molèster den barionan.

Sr. Presidente,

Ministerio di Enseñansa Siensia, Kultura i Deporte pa ku enseñansa ta konsentrá riba 4 punto:

  • un konsepto di lei nobo tokante enseñansa obligatorio pa garantisá e derechi di formashon di nos yunan i formashon pre-eskolar pa medio di reorganisashon di ODIM-Organisashon Desaroyo Integral di Mucha. Un fundeshi sólido den infansia ta e yabi pa éksito den futuro.
  • Den e kuadro di independisashon di skolnan púbiko pa bira skolnan magnétiko, ta imperativo pa sigui duna mas outonomia riba tereno finansiero pa por funshona mihó.
  • Ta kana e trayekto di optimalisá finansiamentu di estudio pa brinda hóbennan mihó akseso na enseñansa avansá akadémiko pagabel. Den e kuadro aki, lo sera diferente akuerdo di intendimentu (MOU) i traha ku estadonan, por ehèmpel Florida.
  • Ta sigui ku evaluashon i adaptashon di diferente tipo di enseñansa i kuríkula manera pruebanan den gruponan 6 i 7 pa midi progreso di kada hóben i duna e  hóben e sostén nesesario. Tambe kambionan den términonan final di VSBO, AGO, HAVO, VWO i inisio di estudio nobo manera “hoveniersopleiding” i estudio pa bira instruktor di deporte. Un otro desaroyo importante ta ku lo introdusí “value-based education” pa inkorporá norma i balor den diferente nivel di enseñansa pa positivamente influensiá nos forma sosial di komprondé i anda ku otro.

A kuminsá hasi e trámitenan pa duna siensia un lugá mas prominente tambe despues di a partisipá na e foro CILAC di Latino Amerika i Karibe pa forma lasonan i interkambiá den region.

Riba tereno di Kultura a traha riba konsientisashon di nos komunidat i su kultura riku i diverso, entre otro nos rikesa musikal i kulinario. Den 2019 ta selebrá e aña di ka’i di òrgel i pa promé biaha a introdusí premio Broertje Marshall pa stimulá hóbennan pa presta na un nivel haltu i duna rèspèt na tur tipo di fishi. Den kuadro di e trayekto pa fortifiká nos identidat kompartí i konstrukshon di nashon ta trahando riba e tema di emansipashon di nos komunidat i dokumentashon di historia di sklabitut di Kòrsou.

Pa ku deporte ya a dal paso pa inkorporá moveshon i deporte den enseñansa di fundeshi i ta traha riba eksplotashon duradero i optimal di e diferente sentronan deportivo.

Sr. Presidente,

E maneho di Hustisia ta basá riba e dicho: “un man ta laba otro i tur dos ta keda limpi”. Represhon, Prevenshon, Resosialisashon i Maneho di Órden Públiko pa garantisá seguridat i trankilidat den nos pueblo ta bai man den man. Ku e Sentro di Akshon Kòrsou ku a formalisá na 2018, representantenan di tur organisashon ku ta kombatí kriminalidat ta plania i ehekutá akshonnan represivo partikularmente dirigí riba “high impact crimes”. Visibilidat di miembronan di kuerponan uniformá a oumentá drástikamente, a habri reklutashon di kandidatonan pa polis i awor algun personal di RST por traha den kuerpo polisial bou di guia i maneho di KPC pa asina kombatí kriminalidat lokal huntu.

Ta traha riba ampliashon di e kantidat di outonan di polis, instalashon di mas kámara na lugánan stratégiko, drechamentu di edifisionan di e kadena hudisial i aparatonan pa intersepshon di drone den nos instituto penitensiario i amplia kapasidat di detenshon.

Den koperashon ku Hulanda a drecha e baraknan di ilegal i a evaluá e maneho di Imigrashon i Trafikashon di hende. A akordá i implementá un maneho nobo pa loke ta trata e artíkulo 3 di e Tratado Europeo di Derechonan Humano i a stipulá un maneho konkreto pa loke ta trata personanan indokumentá ku ta yega for di Venezuela.

Resientemente a kuminsá e programa HALT kaminda menornan di edat ku a bini den kontakto ku Hustisia ta risibí guia en bes di enkarselá nan sin mas. “Monitoringsteam Resocialisatie” a keda instituí pa vigilá ku e proseso di resosialisashon i guia tantu ora ku detenidonan ta den e diferente institutonan, komo despues ku nan a sali, ta duna resultado.

Aña 2019/2020 ta aña di Prevenshon i a organisá vários konsulta di bario huntu ku polisnan di bario. Gobièrnu ta satisfecho ku nombramentu di Polisnan di bario ku mester siñalá e foko di problemanan pa por prevení i halsa seguridat. Hustisia ta sigui para duru kontra violensia doméstiko i tambe ta sostené e Proyekto kontra “Abusu seksual di mucha” debidamente.

Mester enfatisá e echo, ku trankilidat den nos pueblo ta un responsabilidat kompartí i ku tur gremio i persona mester aportá ku nan granito pa yega na seguridat, kuido di otro i pas den tur sentido di palabra.

Senor Presidente,

Ministerio di Asuntunan General tin e tarea magno kual ta buskeda pa un operador pa nos refineria. E luna aki, sèptèmber, lo ta determinante paso ta sigui deliberashon i negosashon intensivo, liderá pa e organisashon enkargá ku maneho di proyekto di RdK (PMO). Un proseso sumamente krusial ku Gobièrnu kompleto ta trata ku diligensia i seriedat pa hasi e mihó eskoho pa Kòrsou i futuro generashonnan di Yu’i Kòrsou.

E situashon na nos pais bisiña Venezuela ta eksigí atenshon i bastante rekurso di e Ministerio. Kontinuamente ta monitoriá i trata temanan importante manera nos frontera, almasenahe di kombustibel, sanshonnan, migrashon i kolaborashon ku organisashonnan internashonal i otro pais den Reino i region.

Despues di a interkambiá ku stakeholders a skohe 9 pais di enfoke, entre otro Merka, Republika Dominikano i Colombia ku ta bai fortifiká laso ku’né pa stimulá relashonnan komersial i sosio-kultural, mientras nos ta sigui posishoná nos mes stratégikamente pa partisipá na foro i plataformanan regional i internashonal manera CARICOM.

Kòrsou a brasa e Agènda 2030 di metanan di desaroyo duradero di Nashonnan Uni, konosí komo Sustainable Development Goals (SDGs). Awor ku un komishon nashonal permanente i komishon di estadisika, lo guia ministerionan den kolaborashon ku NGO’s, sektor privá i institutonan akadémiko den implementashon di e SDGs prioritario manerá stipulá den e roadmap pa Kòrsou. Pronto ta lansa e wèpsait kaminda komunidat lokal i internashonal ta keda informá di progreso di Kòrsou riba e Agènda 2030 i SDGs.

Nos identitat kolektivo komo nashon ta algu ku ta den desaroyo, algu ku ta bibu i pesei ta traha na forma orgániko riba esaki, basá riba komponentenan manera:  balornan klave ku nos ta kompartí ku mester sòru pa un mihó kombibensia i komprenshon mutuo,nos historianan kompartí via di nos diversidat, nos selebrashonnan nashonal, nos héroenan aktual i figuranan históriko, pero tambe kiko ta e elemenentonan di nos vishon kompartí pa desaroyo di Kòrsou.

Sr. Presidente, honorabel miembronan di parlamento,

Gobièrnu ta konsiente ku na kaminda pa rekuperashon i kresementu, e ta pidi sakrifisio, komprenshon i konfiansa di kada un suidadano. Gobièrnu a instituí un proseso pa stimulá i krea espasio pa interkambio konstruktivo, ku ta e Konsulta Nashonal ku ta tuma lugá. No pa tende kiko Gobièrnu kier bisa, pero pa Gobièrnu tende di suidadanonan kiko ta nan pensamentu, kua ideanan por konta ku sosten i kiko suidadano kier kontribuí pa realisá desaroyo duradero.

Den kada krisis, i ku tur desafio, semper tin oportunidat. Den e kaso aki, Gobièrnu ta mira e oportunidat pa nos transformá e retonan ku nos pais ta enfrentá for di raís p’asina huntu nos ban krese. Krese den nos kompromiso ku nos país, krese den kontabilidat, nos abilidat pa kontra otro den tempu bon i menos bon, i krese den nos kreatividat i produktividat pa realisá nos potensial.

Pará dilanti momentonan klave pa nos pais, ta ora pa un i tur – suidadano, trahadó, empresario, mandatario i parlamentario- fihá kiko por ta su kontribushon na e proseso di kambio ku mester tuma lugá den e próksimo añanan. Ta un responsabilidat kompartí ku nos kada unu tin ku tuma riba nos mes.

Gobièrnu ta hasi un apelashon pa nos ta desidido, ku konfiansa den otro i uní den un esfuerso kolektivo pa bienestar di nos komunidat.

Awor mas ku nunka, Kòrsou ta konta ku nos.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: