Promé anochi di selebrashon “Kòrsou un nashon bou di Dios”
Promé anochi di selebrashon “Kòrsou un nashon bou di Dios”
Kòrsou, 10 di sèptèmber 2019
E anochi di alabansa i selebrashon organisá pa Konseho di Iglesianan di Kòrsou i Kas di Beibel den koperashon ku Instituto Embahador di Reino, ku a tuma lugá riba Brionplein djabièrnè último a konta ku presensia di un kantidat grandi di persona di tur gremio di nos komunidat.
Di 7– pa 7.30 tabatin un momentu kaminda den kuadro di Trias Polítika, Presidente di Kas di Beibel señora Isidora a hasi entrega di e promé Beibel di Estudio na Papiamentu, na Minister Presidente di Kòrsou sr. E Ruggenaath, Representante di Presidente di Parlamento di Kòrsou sra Anne Marie Pauletta. i Representante di Presidente di Korte Komun di Hustisia di Aruba, Kòrsou, Sint Maarten Bonaire, Sint Eustatius i Saba, sr. mr. Maurits de Kort.
Presidente di Konseho di Iglesianan señora Meyrtha Leetz a trese un reflekshon riba Salmo 33: 1-13. El a enfatisá e importansia di alabansa na Dios i a para ketu na e echo ku Salmo 33:12 “Bendishoná ta e nashon ku Su Dios ta Señor” ta den preámbulo di nos konstitushon. Esaki ta un di e diferente motibunan di nos selebrashon; esta ku soberania di Dios ta menshoná den konstitushon di nos nashon.
Despues a sigui alabansa i selebrashon di 7:30 te 9’or. Ku kanto, baile i músika, e multitut a dekretá i selebrá Dios Su grandesa i gradisi’E públikamente pa e echo ku nos ta: “Un Nashon Bou di Dios”.
E evento aki tabata unu históriko, ya ku e pueblo a reuní masalmente den sentro di siudat kaminda nos bandera nashonal ta establesé representando nos grandesa komo pueblo ku e meta, pa komo ún nashon rekonosé soberania di Dios.
Un gradisimentu ta bai di parti di organisadónan na tur ku di un òf otro forma a koperá pa e evento aki a bira realidat i na e pueblo di Kòrsou ku a kontestá na e yamada pa bin halsa Dios den sentro di siudat i selebr’E i deklar’E komo Rei di nos nashon.
Atentamente,
Konseho di Iglesianan di Kòrsou Kas di Beibel
Sra. Meyrtha Leetz-Cijntje
Presidente Konseho di Iglesianan di Kòrsou Tel: 5691227/5105010 |
Sr. Armin Elisa
Direktor Kas di Beibel Tel: 5600020
|
Sr. Thyrone Magloire
Presidente Instituto Embahador di Reino Tel: 5216736 |