Stephen Walroud: “Oposishon no tin niun klase di rèspèt pa pueblo”

Walroud (PAR): Lider di oposishon ta papia na radio si pero no ta bin reunion
Oposishon no tin niun klase di rèspèt pa pueblo

 

Awe na apertura di aña parlamentario henter oposishon – ku eksepshon di sra. Moses – a keda sin bin e reunion importante aki. Apertura di aña parlamentario ta un reunion ku su tradishonnan rondó di dje ku ta importante pa e mero echo ku gobernadó ante parlamento, ante korte pero tambe ante representantenan di nos oréganonan di estado i otro organisashonnan importante, ta presentá e intenshonnan di nos gobièrnu pa e aña nos dilanti. Un okashon unda abo komo representante di pueblo mester tei si bo ta tuma bo trabou ku pueblo ta pasa bu p’e na serio.

Pero en bes di seriedat nos ta mira kada dia mas ku partidonan manera MFK, KDNT i PS ta mustra ku nan no tin niun klase di rèspèt pa nos kustumbernan i tradishonnan parlamentario. Tampoko e partidonan aki ta kumpli ku e komportashon ku por ferwagt di un representante di pueblo manera entrega bo asiento ora bo a bira un sospechoso òf un kondenado. Es mas, resientemente nos por a mira ku e partidonan aki – inkluso e partido di  sr. Moses – a bai asina leu di purba kòrta na pianan di nos estado di derechi i purba di pone nos demokrasia un banda. Anto ni di papia di partimentu di wanta den kara, duna bo kolega un ‘bodycheck’ i komo presidente di parlamento keda sin yama un reunion pa evita ku nan ta bahabo komo presidente? Ta realmente pueblo tin ku sinta mira kon kada bes e nivel den parlamento ta sak un tiki mas? Hasta cuando?

Komo parlamentario mi ta di opinion ku Kòrsou no ta sirbi ku representantenan di pueblo ku no tin rèspèt pa nan funshon, e órgano ku nan ta parti di dje ni e pueblo ku nan tin ku representá. Kòrsou mester di representantenan di pueblo ku tin e seriedat nesesario pa saka e pais aki for di e awanan brutu ku nos ta aden. Ta parlamentarionan suak i sin kompas moral ta ko-responsabel pa e situashon ku nos pais ta aden awe.  P’esei ora e momento di skohe parlamentario yega atrobe, mi ta spera ku pueblo lo tene kuenta ku loke mi ta señalando.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: