LABDEMED INOVANDO KUIDO DI KALIDAT I TA PONIENDO MANEHO DI KUIDO MAS DEN  MAN DI E KLIENTE

LABDEMED INOVANDO KUIDO DI KALIDAT I TA PONIENDO MANEHO DI KUIDO MAS DEN 

MAN DI E KLIENTE

 

Willemstad- Kalidat i konfiabilidat di kuido, kombiná  ku maneho di propio salú mas den man di e kliente, ta para sentral den maneho di LabdeMed ( Laboratorio de Medicos.)  P’esei LabdeMed komo un laboratorio inovativo ku konstantemente ta buska pa mehorá su kalidat, konfiabilidat i servisio a presentá su servisionan inovativo na komunidat di Kòrsou.  Un wèpsait ku informashon amplio i útil, un portal pa wak resultadonan di tèstnan i un App ku ta pone maneho di bo salú den bo plant’i man ta servisionan ku LabdeMed ta brinda. Kalidat ta punto di salida pa LabdeMed p’esei e laboratorio ta konta ku akreditashon ISO 15189 di Accreditation Program of American Association for Laboratory Accreditation (A2LA.)  LabdeMed ta kombiná servisio inovativo i kalidat ku bo por konfia den dje, ku un staf di profeshonal bon prepará. LabdeMed ta konta awor ku e servisionan di dr. Nasser Ajubi.

Labdemed ta introdusí wèpsait nobo, portal ku resultado di tèst i app

Un di e puntonan di salida di LabdeMed ta ku servisio di laboratorio mester ta aksesibel i ku maneho di kuido mester ta mas tantu den man di e propio kliente. Den e kuadro aki LabdeMed a renobá su wèpsait. E wèpsait di LabdeMed ta un punto sentral kaminda e kliente por haña tur informashon relevante kon LabdeMed por sirbi e mihó. For di mesun wèpsait aki e kliente i profeshonalnan den kuido por subi riba e portal ku ta duna nan resultadonan di tèst realisá pa LabdeMed. Den e portal kada kliente individual por wak su mes resultadonan di tèstnan hasí na LabdeMed. Resultado di e tèstnan lo ta na mes momentu tambe aksesibel pa e dòkter ku a pidi pashènt hasi e tèst. E portal ta hasié posibel pa e pashènt mes mira ku su dòkter a risibí su tèst i ku e no tin nodi di bai e dòkter innesesariamente.  E portal ta brinda tambe e.o. tendenshanan den tempu di tèstnan similar hasí. Banda di e wèpsait i portal LabdeMed ta introdusí su app. E app ta algu ku ta pas den e patronchi di bida di e hende moderno i ta pone maneho di su kuido den su mes man. Por download e app riba telefòn for di Apple of Google store. LabdeMed ta kontentu i orguyoso di ta e promé laboratorio pa ofresé e portal i app na komunidat di Kòrsou.

 

Staff di LabdeMed amplia ku dr. Ajubi

Tur e servisio aki ta konta ku sosten di e staf profeshonal i bon prepará di LabdeMed.  LabdeMed ta orguyoso ku resientemente por konta tambe ku servisio di dr. Ajubi. Dr. Ajubi ta un profeshonal ku amplio preparashon I eksperensha komo Kímiko klíniko.  E tin20 aña di eksperensha den mundu di laboratorio i te ku resien tabata fungi komo direktor/kímiko klíniko di Sint Maarten Laboratory Services NV. Dr. Ajubi a kapasitá su mes den diferente área di maneho di kalidat di laboratorio i tin eksperensia amplio riba diferente tereno di investigashon médiko ku durante su añanan di eksperensia a resultá den diferente publikashon sientífiko den revistanan sientífiko di renombre internashonal. Dr. Ajubi ta trese un eksperensia amplio i diversifiká mirando ku e la traha den diferente laboratorionan di diferente tamaño i kompleksidat, tantu den klínika ku den laboratorionan poliklíniko. Mirando ku e la auditá práktikamente tur laboratorio den Karibe Hulandes, e por usa e eksperiensha aki pa mehorá e kalidat di servisio di laboratorio di un forma ophetivo i profeshonal. Dr. Ajubi ta kere firmemente den kapasitashon di personal pa nan por brinda servisio di laboratorio di un manera profeshonal i safe. Su trayektorio largu pa brinda momentunan edukativo i kontribuí na kapasitashon ta pa piapa su mes.