Frakshon di MAN ku petishon pa un reunion públiko enkuanto seguridat den tráfiko i infrastruktura di nos pais.

Frakshon di MAN ku petishon pa un reunion públiko enkuanto seguridat den tráfiko i infrastruktura di nos pais.

 

Kòrsou ta un pais di 444 km2. Nos lei di tráfiko ta permití pa kore te ku un

máksimo di 80 kilometer. Esaki ta nifiká ku si un outomobilista mantené e

velosidat aki praktikamente e kantidat di aksidente lo ta hopi ménos i e kantidat

di aksidentenan ku resultado fatal lo ta kasi nulo. Resientemente nos por a tuma

nota di un kaso lamentabel kaminda un mama i su yu a pèrdè nan bida. Den

pasado tambe tabatin hopi kaso kaminda hende di un forma inosentemente a

bin pèrdè na bida debí na sea velosidat haltu, falta di bistimentu di faha di

seguridat, pasa den lus kòrá òf falta di dunamentu di preferensia. Tambe nos ta

mira ku e komportashon di outomobilistanan den tráfiko ta laga hopi di deseá i

tin biaha kompañá ku komportashon agresivo, e asina yamá ‘road rage’.

Relashoná ku esaki tambe resientemente a hala nos atenshon un kaso na Banda

Ariba kaminda un aksidente di tráfiko a finalisá den un asesinato. Ta importante pa un pais tin su leinan di tráfiko reglá i tambe tin e kuerpo ku ta

enkargá pa vigilá esaki.

 

Pa medio di un karta na presidente di parlamento frakshon di MAN konforme

artíkulo 33 di reglamentu di órden di Parlamento hasi un petishon pa konvoká un reunion públiko pa trata e siguiente típiko: seguridat den tráfiko i infrastruktura di nos pais.

 

Pa e reunion aki ta pidi pa Minister di Tráfiko, Transporte i Planifikashon

Urbano, Minister di Hustisia i Minister di Maneho di Gobernashon,

Planifikashon i Servisio Públiko ta presente.